وزیراعظم نے سیلاب متاثرین کیلئے امدادی فنڈ قائم کردیا

وزیراعظم نے سندھ اور بلوچستان سمیت ملک بھر میں سیلاب متاثرین کیلئے امدادی فنڈ قائم کردیا۔ شہباز شریف نے مخیر حضرات سے عطیات کی اپیل کردی۔

وزیراعظم آفس میڈیا ونگ سے ہفتہ کو جاری بیان کے مطابق وزیراعظم نے کہا کہ جس طرح اہل پاکستان نے 2005ء کے زلزلے اور 2010ء کے ملک کے سب سے بڑے سیلاب کے وقت متاثرین کی دل کھول کر مدد کرکے پوری دنیا میں ایک مثال قائم کی تھی، آج بھی اسی جذبے کی ضرورت ہے۔

شہباز شریف کا کہنا ہے کہ عوام باالخصوص مخیر حضرات سے درد مندانہ اپیل کرتا ہوں کہ سیلاب کی تباہی کا شکار اہل وطن کی دل کھول کر مدد کریں، شدید بارشوں نے سیلاب کی صورت قیامت صغریٰ برپا کی ہے، بلوچستان میں غیرمعمولی تباہی ہوئی ہے، سندھ، خیبرپختونخوا اور پنجاب میں بے تحاشہ نقصانات ہوئے، حکومت نے مشکل معاشی حالات کے باوجود 5 ارب روپے سیلاب متاثرین کیلئے فوری جاری کر دئیے ہیں۔

انہوں نے کہا کہ مخیر حضرات سے اپیل ہے کہ مشکلات میں گھرے ان پاکستانیوں کو دوبارہ آباد کرنے میں حکومت کا ہاتھ بٹائیں، سیلاب متاثرہ بھائیوں بہنوں اور بچوں کی مدد انصار مدینہ والے جذبے سے کرنے کی ضرورت ہے۔ وزیراعظم کا کہنا ہے کہ سیلاب زدگان کیلئے رقوم پرائم منسٹر ریلیف فنڈ 2022ء کے اکاؤنٹ نمبر جی-12164، میں جمع کرائی جاسکتی ہیں۔

دوسری جانب وفاق نے سیلاب سے متاثرہ علاقوں میں ایمرجنسی نافذ کردی ہے، صوبائی حکومتوں سے بھی گزارش کی ہے کہ متاثرہ علاقوں کو آفت زدہ قرار دیں تاکہ امدادی کاموں کو مزید تیز کیا جاسکے۔

واضح رہے کہ ملک بھر میں بارشوں کے دوران حادثات اور سیلاب سے 300 سے زائد افراد جاں بحق ہوچکے ہیں، ہزاروں گھر مکمل یا جزوی تباہ اور بڑی تعداد میں مویشی ہلاک ہوچکے ہیں جبکہ فصلوں کو بھی شدید نقصان پہنچا ہے۔