ایف بی آر نے مالی سال کے پہلے ماہ ہدف سے زائد ٹیکس اکٹھا کرلیا

فیڈرل بور ڈ آف ریونیو (ایف بی آر ) نے مالی سال کے پہلے ماہ ہدف سے 15 ارب روپے زیادہ ٹیکس اکٹھا کرلیا۔

ایف بی آر حکام کے مطابق مالی سال کے پہلے ماہ یعنی جولائی میں 458 ارب روپے ٹیکس جمع کیا گیا جبکہ ٹیکس محصولات کاماہانہ ہدف 443 ارب روپے تھا۔

اعلامیے کے مطابق گزشتہ سال کے مقابلے میں 10 فیصد زیادہ ٹیکس جمع کیا گیا، جولائی 2021 میں 417 ارب روپے اکھٹے کئے گئے تھے۔

ایف بی آر حکام کی جانب سے اعلامیے میں مزید کہا گیا ہے کہ جولائی کے مہینے میں پہلی بار 458 ارب روپے ٹیکس اکھٹا کیا گیا۔

واضح رہے کہ فیڈرل بور ڈ آف ریونیو (ایف بی آر ) نے 7 ہزار 470 ارب روپے کا بڑا ٹیکس ہدف حاصل کرنے کیلئے نادرا سے مدد لینے کا فیصلہ کیا ہے۔

ایف بی آر حکام کے مطابق نادرا سے زیادہ اخراجات والے مزید ساڑھے 3 ہزار افراد کا مکمل ڈیٹا طلب کرلیا گیا ہے جبکہ ٹریک اینڈ ٹریس اور پوائنٹ آف سیل سسٹم سے بھی مدد لینے کا فیصلہ کیا گیا ہے۔