سينيٹ کی قائمہ کميٹی خزانہ میں ڈالر کی اونچی اڑان پر گرما گرم بحث

ڈالر کی بڑھتی ہوئی قدر اور روپے کی پستی کی بازگشت سینیٹ کی قائمہ کمیٹی خزانہ میں بھی سنائی دی گئی۔

سينيٹ کی قائمہ کميٹی خزانہ کے اجلاس ميں ڈالر کی اونچی اڑان پر گرما گرم بحث ہوئی۔

جمعرات کوسینیٹ کی قائمہ کمیٹی خزانہ کا سلیم مانڈوی والا کی زیرِصدارت اجلاس ہوا۔

تحریک انصاف کے رکن سینیٹر محسن عزیز نے ملک کی خراب معاشی صورت حال کا معاملہ اٹھا دیا اور کہا کہ ملک ڈیفالٹ کرچکا ہے،ایل سیز کھل نہیں رہیں یا تاخیر کا شکار ہیں،کمیٹی معمول کا ایجنڈا چھوڑ کر معیشت پر بحث کرے۔

سینیٹر سعدیہ عباسی نے کہا کہ وزیر خزانہ مفتاح اسماعیل کو کمیٹی اجلاس میں بلایا جائے، وزیرخزانہ کمیٹی کو یقین دیہانی کرائیں کہ ڈالر کیسے نیچے آئے گا۔

محسن عزیز نے مطالبہ کیا کہ حکومت کم ازکم اسٹیٹ بینک کا گورنر تو مقرر کرے،روپے کا فری فال جاری ہےاور پوری دنیا دیکھ رہی ہے۔

کمیٹی کو وزيرمملکت خزانہ عائشہ غوث نے بتايا کہ پاکستان دیوالیہ سے بچ چکا ہے اور چیزوں کو مینج کر رہے ہیں،آئی ایم ایف ایگزیکٹو بورڈ کا اجلاس 25 اگست کو ہوگا اورآئی ایم ایف کے ساتھ ورلڈ بینک، اے ڈی بی سے بھی فنڈز ملیں گے۔

انھوں نے کہا کہ روپے کی قدر میں 12 فیصد کمی امریکہ میں مہنگائی کی وجہ سے ہے، امریکہ نے شرح سود میں اضافہ کیا جس سے ڈالر بھی مہنگا ہوا۔

سينيٹر دنيش کمار کا کہنا تھا کہ ڈالر اسمگلنگ کی وجہ سے مہنگا ہوا ہے،3 بارڈرز بند کردیں تو ڈالر خود بخود نیچے آجائے گا۔