پاکستان » سندھ

کراچی میں چیئرمین اور وائس چیئرمین کیلئے 6614 امیدوار مدمقابل

کراچی میں 25 ٹاونز اور 246 یوسیز بنائی گئی ہیں

سہیل رب خان Jul 18, 2022

سندھ میں بلدیاتی الیکشن کے دوسرے مرحلے میں 24 جولائی کو کراچی اور حیدرآباد ڈویژن کے 16 اضلاع میں پولنگ ہوگی، ان میں حیدرآباد ڈویژن کے 9 اور کراچی ڈویژن کے 7 اضلاع شامل ہیں۔

سندھ لوکل گورنمنٹ ایکٹ 2013 میں ترمیم کے بعد بلدیاتی انتخابات ٹاؤن کی بنیاد پر کرائے جائیں گے، کراچی کو 25 ٹاؤنز، 246 یونین کمیٹیوں اور 984 وارڈز میں تقسیم کیا گیا ہے۔

چیئرمین اور وائس چیئرمین کی نشستوں کے لیے مختلف سیاسی جماعتوں کے 6614 امیدوار بلدیاتی انتخابات میں حصہ لے رہے ہیں جبکہ 8114 امیدوار وارڈ کونسلر کا الیکشن لڑینگے۔

2016 کے آخری بلدیاتی انتخابات ضلع کی بنیاد پر ہوئے تھے جس میں کل 209 یونین کمیٹیاں تھیں، نئی ترامیم کے مطابق یونین کمیٹیوں کی تعداد 209 سے بڑھا کر 246 کردی گئی ہے۔

ضلع وسطی کراچی کا سب سے بڑا ضلع ہے جس میں یونین کمیٹیوں کی تعداد 45 ہے جبکہ اس سے پہلے یہاں 51 یونین کونسلز تھیں، ضلع کورنگی میں یوسیز کی تعداد حسب سابق 37 ہے، ضلع ملیر میں یونین کمیٹیوں کی تعداد 13 سے بڑھا کر 30 کردی گئی ہے۔

نئی ترامیم کے مطابق ضلع غربی کو دو حصوں یعنی ویسٹ اور کیماڑی میں تقسیم کیا گیا ہے، ضلع غربی میں پہلے 46 یو سیز تھیں۔ اب اس کی 33 یونین کمیٹیاں ہیں اور ضلع کیماڑی میں یوسیز کی تعداد 32 ہے۔

ضلع جنوبی میں 26 یوسیز ہیں جبکہ اس سے قبل یہاں 31 یونین کمیٹیاں تھیں، ضلع شرقی میں یوسیز کی تعداد 31 سے بڑھا کر 43 کردی گئی ہے۔

کراچی کے ساتوں اضلاع میں بنائے گئے ٹاؤنز کی تفصیلات نیچے دی گئی ہیں۔

ضلع شرقی:

1۔ صدر ٹاؤن

2۔ چنیسر ٹاؤن

3۔ جناح ٹاؤن

4۔ گلشن ٹاؤن

5۔ صفورہ ٹاؤن

6۔ سہراب گوٹھ ٹاؤن

ضلع جنوبی:

1۔ لیاری ٹاؤن

2۔ ابراہیم حیدری ٹاؤن

ضلع ملیر:

1۔ گڈاپ ٹاؤن

2۔ ملیر ٹاؤن

3۔ کورنگی ٹاؤن

ضلع کورنگی:

1۔ لانڈھی ٹاؤن

2۔ ماڈل کالونی ٹاؤن

3۔ شاہ فیصل ٹاؤن

ضلع غربی:

1۔ اونگی ٹاؤن

2۔ مومن آباد ٹاؤن

3۔ منگھوپیر ٹاؤن

4۔ موریرو ٹاؤن

ضلع کیماڑی:

1۔ بلدیہ ٹاؤن

2۔ ماڑی پور ٹاؤن

ضلع وسطی:

1۔ نارتھ ناظم آباد ٹاؤن

2۔ نیو کراچی ٹاؤن

3۔ ناظم آباد ٹاؤن

4۔ گلبرگ ٹاؤن

5۔ لیاقت آباد ٹاؤن

کراچی کے میئر کا انتخاب یونین کمیٹی سے جیتنے والے چیئرمین کرینگے، واضح رہے کہ سندھ میں بلدیاتی انتخابات کا پہلا مرحلہ 26 جون کو 14 اضلاع میں ہوا تھا جس میں پاکستان پیپلز پارٹی نے نمایاں کامیابی حاصل کی تھی۔