عوام کے رونے کے دن ختم اور عمران خان کے شروع ہوچکے ہیں، مریم نواز

مسلم لیگ ن کی نائب صدر مریم نواز کا کہنا ہے کہ عوام کے رونے کے دن ختم ہوگئے اب عمران خان کے رونے کے دن شروع ہوگئے ہیں۔

لیہ میں عوامی جلسے سے خطاب کرتے ہوئے مسلم لیگ ن کی نائب صدر مریم نواز کا کہنا تھا کہ یہ جلسہ نہیں بلکہ اللہ تعالی کی شان دیکھ رہی ہوں، کیوں کہ میں نے جو عوام کا جم غفیر دیکھا، انہوں ںے اپنا ریکارڈ خود ہی توڑ دیا۔

مریم نواز نے کہا کہ 17جولائی کو لیہ میں شیر شیر کی آواز آئے گی، ہمارا مقابلہ کسی گیڈر سے نہیں بلکہ گیڈرکی لائی ہوئی مہنگائی،کرپشن سےہے، پنجاب کا مقابلہ پنجاب دشمن عمران خان سے ہے، یہ فتنہ خان پنجاب کی تباہی کا سب سے بڑا منصوبہ ہے، اس شخص نے پنجاب کو لوٹنے کیلئے گھرکی خواتین کو لگایا ہوا تھا، یہ کیسا جہاد ہے جس کے فنڈ کیلئے بشریٰ بی بی اور فرح کو رکھا ہوا تھا۔

ن لیگ کی نائب صدر کا کہنا تھا کہ عمران خان کے پی میں 9 سال سے حکمران ہے، وہاں بارشوں سے تباہی ہوئی اور پشاور، مردان اور سوابی ڈوب گئے، اور عمران خان اسلام آباد کی حدود سے پنجاب میں آکر گالم گلوچ کر کے چلے جاتے ہیں، نواز شریف نے پاکستان میں فلاحی منصوبے لگائے اور عمران خان نے تباہی کے منصوبے لگائے، عمران خان پنجاب کو ڈبونے یہاں آگیا ہے۔

مریم نواز کا کہنا تھا کہ نواز شریف نے سی پیک بنایا جو پاکستان کی ترقی کا سب سے بڑا منصوبہ تھا، عمران خان چار سال تک حکمرانی کرتے رہے اور انہوں نے گوگی، پنکی اکنامک کوریڈو بنایا، اس نے جی پیک بنایا اور پنجاب کی ترقی کے پیسے سے بنی گالہ منی گالہ بن گیا۔

لیگی رہنما نے کہا کہ گزشتہ روز دیکھا عمران خان رو رہے ہیں، جب لوگ آٹے اور چینی کو ترستے تھے اس وقت تمہیں رونا نہیں آیا، آئی ایم ایف سے معاہدہ کرتے ہوئے تمہیں رونا نہیں آیا، فرح خان پنجاب کو لوٹ کر کھا رہی تھی تب رونا نہیں آیا، عمران خان یاد رکھو عوام کے رونے کے دن ختم ہو گئے، اب تم نے رونا ہے۔

مریم نواز نے مزید کہا کہ حمزہ نے پنجاب بھر میں 100 یونٹ استعمال کرنے والوں کیلئے بجلی مفت کر دی، تو عمران خان وزیراعلیٰ پنجاب کے اس اقدام کو روکنے کیلئے عدالت چلے گئے، عمران خان کچھ بھی کر لے آج نہیں تو 17 جولائی کے بعد پنجاب کے عوام کو یہ سہولت مل کر رہے گی، پنجاب اور پاکستان کے عوام جانتے ہیں یہ تباہی لانے والے کا نام عمران خان ہے۔

مریم نواز نے کہا کہ عمران خان نے حکومت جانے کا پتہ چلنے پر پیٹرول و ڈیزل کی قیمتیں گرا دیں، اب کہتا ہے کہ پیٹرول کی قیمتیں کم کرو، تمہارا قیمتیں کم کرنے سے کیا تعلق ہے، شہباز شریف نے جو مشکل فیصلے کرنے تھے کرلیے، اب اچھے دن آنے والے ہیں، اب اچھے دن خود دستک دے رہے ہیں، آنے والے چند گھنٹوں میں پیٹرول اور ڈیزل کی قیمتیں کم ہوں گی، اب مہنگائی کو ریورس گیئر لگے گا، اور ترقی پانچویں گیئر میں جائے گی۔