سنگین الزام کے بعد عمران خان کا سیاست میں رہنے کا کوئی حق نہیں رہا، خورشید شاہ

پیپلزپارٹی کے سینئر رہنما اور وفاقی وزیر خورشید شاہ کا کہنا ہے کہ سنگین الزام کے بعد عمران خان کا سیاست میں حصہ لینے کا اب کوئی حق نہیں رہا۔

سابق چیئرمین نیب جاوید اقبال کی جانب سے مبینہ ہراسگی کی متاثرہ خاتون کے بیان پر رد عمل کا اظہا کرتے ہوئے پیپلزپارٹی کے رہنما اور وفاقی وزیر خورشید کا کہنا تھا کہ متاثرہ خاتون کو وزیراعظم ہاؤس میں رکھے جانے کے بیان سے سر شرم سے جھک گئے۔

وفاقی وزیر کا کہنا تھا کہ سابق چیئرمین نیب کو بلیک میل کرنے کيلئے متاثرہ خاتون کو وزیراعظم ہاؤس میں رکھا گیا، وزیراعظم ہاؤس کی حیثیت قوم کی بیٹیوں کیلئے دارالامان کی ہے، وزیراعظم ہاؤس کو ہراسانی مرکز بنادیا جانا پوری ریاست کيلئے باعث شرمندگی ہے۔

خورشید شاہ نے کہا کہ سابق وزیر اعظم عمران خان کو فوری طور پر اپنی پارٹی قیادت سے الگ ہونا چاہئے، سنگین الزام کے بعد ان کا سیاست میں حصہ لینے کا اب کوئی حق نہیں رہا، عمران خان پہلے صاف شفاف تحقیقات کا سامنا کرے۔

رہنما پی پی پی نے کہا کہ ثابت ہو گیا سیاسی مخالفین کو سبق سکھانے کيلئے عمران خان نے ہر حد پار کی، اس شرمناک کام میں بھی عمران خان نے متاثرہ خاتون کو ریاست مدینہ کا حوالہ دیا۔ پاکستان کی سیاست اور ریاست کو داغدار کرنے کا اس سے بڑا الزام کیا ہوگا، پاکستان کے تمام ادارے، پارلیمان ہر صورت معاملے کی تہہ تک پہنچیں۔