ن لیگ کے حامیوں کے اعلان پرجمائما کا غم وغصہ

میری والدہ کا پاکستانی سیاست سے کیا لینا دینا

جمائما گولڈ اسمتھ نے پاکستان مسلم لیگ ن کی جانب سے سرے میں اپنی والدہ کی رہائشگاہ کے باہراحتجاج کے اعلان پرغم وغصے کا اظہارکیا ہے۔

برطانوی فلمسازو پروڈیوسراورسابق وزیراعظم عمران خان کی سابقہ اہلیہ جمائما گو طلاق کے بعد پاکستان سے جاچکی ہیں لیکن سوشل میڈیا کے ذریعے ان کا رشتہ یہاں کے لوگوں سے جڑارہتاہے۔

پاکستانی سیاست پربھی گہری نظررکھنے والی جمائما نے ن لیگ اورپی ٹی آئی کی سیاسی چپقلش میں اپنے خاندان کو نشانہ بنائے جانے پرتنقید کی ہے، اوورسیز پاکستانی اپنے اپنے قائدین کی حمایت میں کبھی جمائما تو کبھی لندن میں سابق لیگی وزیراعظم نوازشریف کی رہائشگاہ کے باہر احتجاج کرتے رہتے ہیں۔

اسی حوالے سے کی جانے والی ٹویٹ میں جمائما نے لکھا، “آخران لوگوں کا مسئلہ کیا ہے؟رواں ہفتے کے اختتام پرمیری 88 سالہ والدہ کے گھرکے باہر ایک اور احتجاج کا اعلان کیا گیا ہے اور یہ تیسری بار ہے”۔

عمران خان کی سابقہ اہلیہ نے استفسار کیا کہ آخران کی والدہ کا پاکستانی سیاست سے کیالینا دینا ہے، یہ ان کے لیے پریشان کن اور پولیس کے وقت کا بھی مکمل ضیاع ہے۔

اس سے قبل اپریل میں بھی عمران خان کی حکومت کے خاتمے کے بعد ن لیگ کے حامیوں نے لندن میں نواز شریف کی رہائشگاہ کے باہر پی ٹی آئی کے مظاہروں کے جواب میں سرے میں جمائما کی رہائشگاہ کے باہراحتجاجی مظاہرہ کیا تھا۔

جمائما نے ٹوئٹرپرویڈیو شیئرکی تھی جس میں ایک شخص دھمکی دے رہا ہے کہ اگر پی ٹی آئی کے حامیوں نے ن لیگی قیادت کے گھرکے باہر احتجاج کرنا بند نہ کیا تو وہ ان کے گھر کے بیڈ رومزمیں گھس جائیں گے۔

اس ٹویٹ پر ردعمل میں جمائما کا کہنا تھا کہ ایسا لگتا ہے میں 90 کےلاہور میں واپس آ گئی ہوں، پرانا پاکستان ۔ جو عمران کے نئے پاکستان کی تعمیر کے وعدے کے برعکس اپوزیشن کا نعرہ تھا۔

سال 1995 میں شادی کے بندھن میں بندھنے والے عمران خان اورجمائما گولڈ اسمتھ کی راہیں 2004 میں جدا ہو گئی تھیں لیکن طلاق کے بعد بھی جمائما نے اپنے نام کے ساتھ لفظ خان جوڑے رکھا اورشاید دلی وابستگی کے باعث ہی وہ ہر مشکل وقت میں عمران خان کا ساتھ دیتی آئی ہیں جس کا ایک ثبوت سپریم کورٹ میں عمران خان کیخلاف نااہلی کیس میں منی ٹریل سے متعلق رسیدیں بھجوانا بھی ہے۔

عمران خان اور جمائما کے دو بیٹے قاسم اورسلیمان ہیں جو اپنی والدہ کے ساتھ رہتے ہیں۔

pmln

Jemima Goldsmith

Tabool ads will show in this div