قیمتوں میں اضافہ، پیٹرول اور ڈیزل کی فروخت میں 20فیصد کمی

ملک میں پیٹرول اور ڈیزل کی فروخت میں 20 فیصد تک کمی ہوگئی، آئل کمپنیز ایڈوائزری کونسل کے حکام نے پیٹرول اور ڈیزل کی کھپت میں کمی کی تصدیق کردی۔

آئل کمپنیز ایڈوائزری کونسل حکام نے تصدیق کی ہے کہ پاکستان میں پیٹرول اور ڈیزل کی فروخت میں 20 فیصد تک کمی ہوگئی۔

مزید جانیے: پیٹرولیم مصنوعات کی قیمتوں میں 59 روپے فی لیٹر تک اضافہ

حکام نے وجہ تو نہیں بتائی تاہم ان کا کہنا ہے کہ یکم جون سے ڈیزل، اور پیٹرول کی فروخت میں نمایاں کمی دیکھی جارہی ہے، یہ کہنا قبل از وقت ہے کہ قیمتیں بڑھنے سے کھپت میں کمی آئی ہے۔

واضح رہے کہ موجودہ اتحادی حکومت نے 27 مئی، 3 جون اور 16 جون کو پیٹرول کی قیمت میں 84 روپے فی لیٹر تک اضافہ کردیا ہے جبکہ 50 روپے لیوی بھی بتدریج لاگو کرنے کا اعلان کیا ہے۔

یہ بھی پڑھیں: پیٹرول کی ڈبل سنچری کے بعد عوام نے میٹرو کا رخ کرلیا

او سی اے سی حکام کا کہنا ہے کہ پیٹرول کی یومیہ کھپت 25 ہزار میٹرک ٹن سے کم ہوکر 20 ہزار میٹرک ٹن ہوگئی، ڈیزل کی یومیہ کھپت میں بھی 5 ہزار میٹرک ٹن کمی آئی ہے۔

حکام کا دعویٰ ہے کہ قیمتوں میں متوقع اضافہ کے باعث لوگوں نے پیٹرول اور ڈیزل کی ذخیرہ اندوزی بھی کرلی تھی۔