این اے 245 ضمنی انتخاب: فاروق ستار سمیت 31 امیدواروں کے کاغذات نامزدگی جمع

این اے 245 کراچی کے ضمنی انتخاب کیلئے کاغذات نامزدگی جمع کرانے کا وقت ختم ہوگیا، سیاسی و مذہبی جماعتوں سمیت 31 امیدواروں نے کاغذات نامزدگی جمع کرادیئے، ڈاکٹر فاروق ستار نے آزاد حیثیت سے کاغذات نامزدگی جمع کرائے۔

الیکشن کمیشن حکام کے مطابق ایم کیو ایم پاکستان کے 5، پی ٹی آئی اور پیپلزپارٹی کے 4، 4، پی ایس پی اور ٹی ایل پی کے 3، 3 جبکہ جے یو آئی ف اور مسلم لیگ ن کے 2، 2 امیدواروں نے کاغذات نامزدگی جمع کروائے۔

رپورٹ کے مطابق مہاجر قومی موومنٹ(حقیقی)، آل پاکستان مسلم لیگ، عام لوگ اتحاد پارٹی اور پاکستان مسلم الائنس کے ایک ایک امیدوار نے بھی کاغذات جمع کروائے ہیں۔

این اے 245 کے ضمنی انتخاب کیلئے 4 آزاد امیدواروں نے بھی میں کاغذات نامزدگی جمع کرائے ہیں، جن میں ایم کیو ایم پاکستان کے سابق سینئر رہنماء ڈاکٹر فاروق ستار بھی شامل ہیں، وہ اس نشست پر 2018ء میں ڈاکٹر عامر لیاقت حسین سے شکست کھاگئے تھے۔

این اے 245 پر ضمنی انتخاب کیلئے 25 جون ابتدائی فہرست جاری ہونے کے بعد 27 جون کو کاغذات کی جانچ پڑتال ہوگی، 30 جون تک ریٹرننگ افسر کے فیصلوں کیخلاف اپیل کی جاسکتی ہے جبکہ 5 جولائی کو امیدواروں کی حتمی فہرست جاری کی جائے گی۔

رپورٹ کے مطابق 6 جولائی کو اُمیدوار دستبردار ہو سکتے ہیں، انتخابی نشانات الاٹ کی تاریخ 7 جولائی مقرر کی گئی ہے جبکہ بدھ 27 جولائی کو پولنگ ہوگی۔