عالمی مارکیٹ میں خام تیل کی قیمتوں میں کمی

فی بیرل خام تیل کے نرخوں میں 5 فیصد سے زیادہ کی کمی ریکارڈ

عالمی مارکیٹ میں خام تیل کی قیمت میں 5.47 فیصد کمی ریکارڈ کی گئی ہے، ڈبلیو ٹی ایل کے نرخ 111.42 ڈالر جبکہ برطانوی برینٹ کروڈ کی قیمت 114.29 ڈالر فی بیرل پر آگئی۔

پاکستان سمیت تیل درآمدی ممالک کیلئے اچھی خبر یہ ہے کہ عالمی مارکیٹ میں جمعہ کو کئی ہفتوں بعد تیل کی قیمتوں میں کمی کا رجحان دیکھنے میں آیا، جس کے نتیجے میں ڈبیلو ٹی ایل (پاکستانی وقت کے مطابق رات 8 بجے) 6.17 ڈالر کی کمی سے 111.42 ڈالر فی بیرل کی سطح پر آگیا۔ ڈبیلو ٹی ایل کی قیمت میں 5.47 فیصد کمی ریکارڈ کی گئی۔

اسی طرح برطانوی برینٹ کروڈ بھی 5.50 ڈالر کی کمی سے 114.29 ڈالر کی سطح پر آگیا، برینٹ خام تیل کی قیمت میں بھی جمعہ کو 4.61 فیصد کمی ہوئی، البتہ اوپیک ممالک کے خام تیل کی قیمتوں میں کمی 2 فیصد تک رہی۔

ماہرین کے مطابق روس کی جانب سے بھارت اور چین کو بڑے پیمانے پر تیل کی سپلائی شروع ہوگئی ہے، جس سے روس پر عالمی پابندیاں غیر مؤثر ہونے کا تاثر مل رہا ہے اور پابندی کے سبب تیل کی سپلائی محدود ہونے کے خدشات ختم ہورہے ہیں، جس کی وجہ سے جمعہ کو قیمتوں میں کمی دیکھی گئی۔

عالمی میڈیا رپورٹس کے مطابق روس نے 10 جون کو ختم ہونیوالے ہفتے کے دوران 35 لاکھ 50 ہزار بیرل یومیہ تیل مختلف ممالک کو روانہ کیا گیا، جس میں 50 فیصد یعنی 18 لاکھ 78 ہزار بیرل ایشیا میں بھیجا گیا، روس کی تیل برآمدات کا یہ حجم روس کے یوکرین پر حملے کے بعد ہونیوالی کمی سے 40 فیصد زیادہ ہے۔

ماہرین کا کہنا ہے کہ امریکا، یورپی یونین ممالک سمیت دنیا بھر میں کساد بازاری کے پیش نظر بھی تیل کی طلب کم ہونے کا امکان ہے، جس کا اثر قیمتوں میں کمی کی صورت میں سامنے آرہا ہے۔

واضح رہے کہ ایک ماہ قبل برینٹ آئل اور ڈبیلو ٹی ایل کے نرخ 107 تا 110 ڈالر فی بیرل تھے، تقریباً ایک ماہ بعد دوبارہ تیل کی قیمتیں اس سطح کے قریب آگئی ہیں۔

واضح رہے کہ عالمی قیمتوں کو بنیاد بنا کر موجودہ حکومت نے 20 روز کے دوران پاکستان میں پیٹرول کی فی لیٹر قیمت میں 84 جبکہ ڈیزل پر تقریباً 110 روپے فی لیٹر اضافہ کردیا ہے۔

Petroleum Price

Crude Oil

Tabool ads will show in this div