کالعدم ٹی ٹی پی سے مذاکرات: اتحادیوں کواعتماد میں لینے کیلئے پی پی نےکمیٹی قائم کردی

کالعدم تحریک طالبان پاکستان اور تحریک طالبان افغانستان کے ساتھ مذاکرات کے معاملے پر تین رکنی کمیٹی قائم کردی گئی ہے۔

پاکستان پیپلزپارٹی کی جانب سے جاری اعلامیہ کے مطابق پارٹی چیئرمین بلاول بھٹو زرداری نے ٹی ٹی پی اور ٹی ٹی اے سے مذاکرات کے معاملے پر سیاسی جماعتوں سے رابطوں اور پارلیمان میں معاملے کو اٹھانے کے لئے تین رکنی کمیٹی قائم کردی ہے۔

چیئرمین بلاول بھٹو زرداری کی ہدایت پر بننے والی تین رکنی کمیٹی میں شیری رحمان، فرحت اللہ بابر اور قمر زمان کائرہ شامل ہونگے۔

قبل ازیں گزشتہ روز ہفتہ 11 جون کو ہونے والے زرداری ہاؤس کے اجلاس میں تحریک طالبان افغانستان اور کالعدم تحریک طالبان پاکستان سے متعلق حالیہ پیشرفت کے معاملے پر تبادلہ خیال کیا گیا تھا۔

زرداری ہاؤس میں ہونے والے اعلیٰ سطح کے اجلاس میں پارلیمان کو پہلا اور واحد فورم قرار دینے کے عزم کا اعادہ کیا گیا جہاں ایسے موضوعات پر بحث کی جاسکتی ہے۔

پارٹی کی اعلیٰ قیادت نے اتفاق کیا تھا کہ تحریک طالبان افغانستان اور کالعدم ٹی ٹی پی سے مذاکرات کے معاملے پر پارلیمنٹ کو اعتماد میں لینا ہے، فیصلے وہیں ہونے چاہئیں۔ اجلاس میں یوسف رضا گیلانی، راجہ پرویز اشرف، فریال تالپور، وزیراعلیٰ سندھ مراد علی شاہ، خورشید شاہ اور دیگر رہنماؤں نے شرکت کی تھی۔

پیپلزپارٹی کے آفیشلز ٹوئٹر اکاؤنٹ سے جاری اعلامیے کے مطابق وزیر خارجہ بلاول بھٹو زرداری نے کہا کہ پاکستان پیپلزپارٹی پارلیمان میں تمام فیصلے ہونے پر یقین رکھتی ہے، ہم اتحادی جماعتوں سے رابطہ کرکے آگے بڑھنے کیلئے اتفاق رائے پیدا کریں گے۔