کے الیکڑک کا کراچی میں لوڈشیڈنگ کا نیا مشن شروع

کراچی الیکڑک کی جانب سے شہر بھر میں لوڈ شیڈنگ کا نیا شیڈول جاری کردیا گیا ہے۔ ترجمان کے الیکٹرک کا کہنا ہے کہ مستثنی علاقوں میں یومیہ 3 گھنٹے لوڈشیڈنگ کا آغاز کر رہے ہیں۔

مائیکرو بلاگنگ سائٹ پر جاری بیان میں ترجمان کے الیکٹرک کا کہنا ہے کہ بجلی کی بڑھتی طلب اور گرمی کے پیش نظر کے الیکٹرک کا لوڈشیڈنگ پلان میں تبدیلی کی گئی ہے۔

ترجمان کی جانب سے لوڈشیڈنگ کے نئے پلان کا اعلان کرتے ہوئے کہا گیا ہے کہ کراچی میں مستثنی علاقوں میں یومیہ 3 گھنٹے لوڈشیڈنگ کا آغاز کر رہے ہیں۔

ترجمان کا یہ بھی کہنا تھا کہ لوڈشیڈنگ والے علاقوں میں دورانیہ ایک سے دو گھنٹے کم کیا جائے گا۔ ترجمان کے مطابق صارفین اپنا لوڈشیڈنگ کا شیڈول بذریعہ کے الیکٹرک کی ویب سائٹ، کے ای لائیو ایپ، واٹس ایپ یا ایس ایم ایس سے حاصل کرسکتے ہیں۔

اپنے علاقے میں لوڈشیڈنگ یا بجلی سے متعلق کسی بھی طرح کی معلومات کیلئے آپ درج ذیل لنک کے ذریعے کے الیکٹرک کسٹمر سروس سے معلومات حاصل کرسکتے ہیں۔

لوڈشیڈنگ کی صورت حال

یہاں یہ بات بھی قابل ذکر ہے کہ کے الیکٹرک کے اعلان کے ساتھ ہی کراچی بھر میں فل بلنگ والے علاقوں میں بھی 3 سے 6 گھنٹے کی لوڈشیڈنگ شروع کردی گئی ہے۔

غریب آبادیوں میں بجلی بندش کا عذاب 18 گھنٹے تک پہنچ گیا ہے، جب کہ کئی علاقوں میں شہری رات بجلی کے انتظار میں جاگ کر گزار رہے ہیں۔

شارٹ فال

دوسری جانب ملک بھر میں بجلی کا شارٹ فال پر 6 ہزار 530 میگاواٹ تک پہنچ گیا ہے۔ جاری رپورٹ کے مطابق بجلی کی پیداوار 20 ہزار 170، جب کہ طلب 26 ہزار 700 میگاواٹ ہے۔

جاری اعداد و شمار کے مطابق مختلف علاقوں میں 10 سے 12 گھنٹے کی لوڈشیڈنگ جاری ہے۔ بجلی پیدا کرنے کیلئے پانی سے 4 ہزار 320 میگاواٹ اور سرکاری تھرمل پلانٹس سے 1 ہزار 254 ميگاواٹ بجلی پيدا کی جا رہی ہے۔ آئی پی پیز کی مجموعی پيداوار 11 ہزار 797 میگاواٹ ہے۔