روس سے سستا تيل، حکومت امریکا کو ناراض نہیں کرنا چاہتی، شوکت ترین

سابق وزیرخزانہ شوکت ترین کا کہنا تھا کہ پاکستان کو روس سے 50 روپے سستا تيل ملنا تھا لیکن موجودہ حکومت امریکا کو ناراض نہیں کرنا چاہتی۔

اسلام آباد میں پریس کانفرنس کے دوران شوکت ترین کا کہنا تھا کہ حکومت نے آئی ایم ایف کے دباؤ میں آکر عوام پر ایٹم بم گرادیا، ہم نے پلاننگ کی ہوئی تھی کہ روس سے سستا تیل خریدیں گے، ایسا نہیں تھا کہ 60 روپے بڑھا کر عوام پر ایٹم بم پھینک دیں۔

سابق وزیرخزانہ کا کہنا تھا کہ روس خود گھر چھوڑنے آئے گا کیا پیٹرول؟ اس حکومت کو چاہیے کہ فوری طور پر روس کے پاس پہنچیں۔

انہوں نے کہا کہ حکومت روس کے پاس گئی تو امریکا ناراض ہوگا، ٹارگٹڈ سبسڈی دینے کے بجائے حکومت نے سب شہریوں پر تیل کی قیمتوں کا بوجھ ڈال دیا۔

تحریک انصاف کے سینیٹر شوکت ترین کا کہنا تھا کہ ہم نے پہلے ہی پيغام دے دياتھا کہ حکومت گئی تو معیشت تباہ ہوجائے گی۔ انہوں نے ملک ميں فوری نئے الیکشن کرانے کا مطالبہ کرديا۔

سابق وزیرخزانہ کا کہنا تھا کہ حکومت سے باہر ہوتے ہوئے ایک روپیہ بڑھانے پر یہ کہتے تھے طوفان آجائے گا، اب پیٹرول اور ڈیزل کی قیمتوں میں ایک ہفتے کے دوران 60 روپے اضافہ ہوگیا۔

شوکت ترین نے کہا کہ نالائق اور گھبرائی ہوئی حکومت آگئی ہے، پیٹرولیم کمپنیاں ڈیزل پر 70 اور پیٹرول پر 50 روپے فی لیٹر کمائی کر رہی ہیں۔

رہنما تحریک انصاف حماد اظہر کا کہنا تھا کہ رواں سال کے آغاز سے ہی ہماری حکومت نے عوام سے مہنگائی کا بوجھ کم کرنا شروع کیا۔ ہم نے اپریل سے سستا پیٹرول خریدنے کا فیصلہ کر لیا تھا، پیٹرولیم مصنوعات سمیت معاشی حالات میں بہتری لانے کا جامع پلان بھی بنا دیا تھا۔

حماد اظہر کا کہنا تھا کہ بجلی کی قلت کا سبب اس حکومت کی ناقص کارکردگی ہے، لوڈشیڈنگ سے معیشت کو ہر گھنٹے اربوں روپوں کا نقصان ہوا ہے، کہ بجلی کی کمی کے سبب پاکستان میں اسٹیل کی صنعت کو بند کر دیا گیا ہے، سی پیک کے پاور پلانٹ اس وقت صرف 25 فیصد تک کام کر رہے ہیں۔

انہوں نے کہا بجلی کی قیمت کو اب بڑھا کر 47 فیصد تک مہنگا کیا جائے گا، مفتاح اسماعیل اب 16 روپے یونٹ سے 24 روپے فی یونٹ تک مہنگا کرنے والے ہیں۔