خورشیدشاہ کا سرکولیشن کے ذریعے سمریوں کی منظوری پراعتراض

وفاقی وزیر آبی وسائل خورشید شاہ نے وفاقی کابینہ کے اجلاس معمول کے مطابق نہ بلانے اور اہم سمریوں کی منظوری سرکولیشن کے ذریعے لینے پر تحفطات کا اظہار کیا ہے۔

وزیراعظم کو لکھے گئے خط میں وفاقی وزیر برائے آبی وسائل سید خورشید شاہ نے معاملے پر اعتراض اٹھایا ہے۔

خورشید شاہ کی جانب سے لکھے گئے خط میں کہا گیا ہے کہ وہ معاملات جن پر وفاقی کابینہ کے اجلاسوں میں بحث ہونی چاہیے اور بحث کے بعد منظوری ہونی چاہیے ان کو سمریوں کی سرکولیشن کے ذریعے منظور کیا جا رہا ہے۔

خط میں کہا گیا کہ اور سرکولیشن کے ذریعے وزرا سے منظوری حاصل کرنے کی پالیسی تحریک انصاف کی تھی جسے جاری رکھنے سے اچھا تاثر پیدا نہیں ہوتا۔

خورشید شاہ نے خط میں کہا کہ میری تجویز ہے کہ آئندہ وزارتوں کی طرف سے بھیجی جانے والی سمریاں کابینہ کے ایجنڈے میں شامل کی جائے، تاکہ منظوری سے قبل فیصلوں کے فوائد اور نقصانات پر تفصیل سے تبادلہ خیال کیا جا سکے۔

خیال رہے کہ اتحادی جماعتوں پر مشتمل وزیراعظم شہباز شریف کی وفاقی کابینہ میں شامل پیپلزپارٹی سب س بڑی اتحادی جماعت ہے۔