کرن جوہر نے ‘نچ پنجابن’ کی چوری تسلیم کرلی

ابرارالحق نے قانونی کارروائی کی دھمکی دی تھی

کرن جوہر نے بالآخر ابرارالحق کے مقبول گانے ‘نچ پنجابن’ کی چوری تسلیم کرتے ہوئے گانے کی کریڈٹس میں ابرار کا نام شامل کرلیاہے۔

چند روز قبل دھرما پروڈکشن کے بینر تلے بننے والی فلم ‘جُگ جُگ جیو’ کے ٹریلرمیں نچ پنجابن کی نقالی سامنے آنےکے بعد ابرار نے اپنی ٹویٹ میں گانے کے کاپی رائٹس فروخت کرنے کی تردید کرتے ہوئے لکھا تھا کہ کرن جوہر جیسے پروڈیوسر کو میرا گانا کاپی نہیں کرنا چاہیے تھا، یہ میرا چھٹا گانا کاپی کیا گیاہے جس کی ہرگزاجازت نہیں دوں گا۔

ابرارکا کہناتھا کہ میں نے کسی بھارتی فلم کو اپنے گانے کے حقوق فروخت نہیں کیے، گانے کے استعمال پرہرجانے کے لیے کورٹ جانے کا حق محفوظ رکھتا ہوں۔

اس چوری کے جواب میں کرن جوہرنے کوئی ردعمل نہیں دیاتھا تاہم کئی بڑے انٹرٹینمنٹ لیبلز کو کنٹرول کرنے والی برطانوی میوزک ایجنسی مووی باکس نے ابرارکی ٹویٹ پربیان جاری کیا کہ جُگ جُگ جیو میں نچ پنجابن کوشامل کرنے کے لیے باضابطہ طورپر لائسنس دیا گیا ہے۔کرن جوہراوردھرما موویز کو یہ گانا اپنی فلم میں استعمال کرنے کا قانونی حق حاصل ہے، ابرارالحق کا ٹویٹ توہین آمیزاورمکمل طورپرناقابل قبول ہے۔

مووی باکس کے اس دعویٰ پر ابرارالحق نے جوابی ٹویٹ میں واضح کیا تھا کہ انہوں نے کسی کو بھی اس گانے کے استعمال کی اجازت کا لائسنس نہیں دیا ہے، اگرکوئی ایسا دعویٰ کرہا ہے تو لائسنس پیش کرے۔

بعدازاں ایک یو ٹیوبرکو انٹرویومیں ابرارالحق نے مشروط پیشکش کرتے ہوئے کہا تھا کہ کرن جوہراوربھارتی اداکارکشمیر کی آزادی کا نعرہ لگائیں تو اپنا گانا انہیں ’گفٹ ’ کردوں گا۔

مزید پڑھیے: نچ پنجابن کے بعد ‘جُگ جُگ جیو’ کی کہانی بھی چوری کی نکلی

تازہ ترین پیشرفت یہ ہے کہ کرن جوہرنے فلم کا گانا نچ پنجابن آج یو ٹیوب ریلیزکیا ہےجس میں ابرارالحق کو گانے کے بول اور میوزک کا مکمل کریڈٹ دیا گیا ہے۔

بھارتی فلمسازنے انسٹااسٹوریزمیں بھی گانے کا پوسٹرشیئرکیا جس میں ابرارالحق کا نام بھی دیکھا جاسکتا ہے۔

تاحال ابرارکی جانب سے اس جیت پرکوئی موقف سامنے نہیں آیا ہے۔

اب یہ قانونی کارروائی دھمکی کا اثرہے یاکاپی رائٹس ایکٹ کی خلاف ورزی کی تلافی، یہ تو کرن جوہر ہی جانیں لیکن ابرارالحق اکیلے نہیں جوبالی ووڈ کی چربہ سازی کا شکار ہوئے ہوں ، بھارت کی جانب سے اکثرہی پاکستان کے مقبول گیتوں کے بول یا دھن چرالی جاتی ہے اور تو اور اب ہماری ڈراما انڈسٹری بھی محفوظ نہیں جہاں سے پورے پورے مناظرکی ہوبہو عکسبندی کاپی کرلی جاتی ہے۔

حال ہی میں بھارتی گلوکارہ کانیکا کپور نے پاکستانی گلوکارہ حدیقہ کیانی کا مقبول ترین گیت بوہے باریاں کی نقالی کی تھی لیکن حدیقہ کی جانب سے نشاندہی پربھارتی گلوکارہ سرے سے یہ ماننے سے ہی انکاری تھیں کہ انہوں نے ایسا کیا۔ٹائمزآف انڈیا کودیے جانےوالے انٹرویومیں کانیکا کا موقف تھا کہ انہیں علم نہیں تھا کہ ایساکوئی گانا بھی موجود ہے اور انہوں نے کسی کے کام کو کاپی کرنے کی کوشش نہیں کی۔

Karan Johar

ABRAR UL HAQ

nach punjaban,

JugJugg Jeeyo

Tabool ads will show in this div