روپے کے مقابلے میں ڈالر کی قدر میں مزید 51 پیسے اضافہ

مقامی کرنسی مارکیٹ میں بدھ کو بھی امریکی ڈالر کے مقابلے میں پاکستانی روپے کو دباو کا سامنا رہا۔

انٹر بینک میں آج بدھ کو ڈالر کی قدر میں مزید 51 پیسے اضافے سے قیمت 201 روپے 92 پیسے تک پہنچ گیا ہے جبکہ اوپن مارکیٹ میں ایک روپے 20 پیسے کے اضافے سے قیمت 203 روپے کے بلند ترین سطح پر پہنچ گیا۔

واضح رہے کہ رواں ہفتے تین روز کے دوران انٹر بینک میں اب تک ڈالر کی قدر میں 1.98روپے کا اضافہ ہوچکا ہے جب کہ اوپن کرنسی مارکیٹ میں ڈالر کی قدر میں ہونے والے اضافہ 2.80روپے ہوگیا ہے۔

گزشتہ ہفتہ19 مئی کو حکومت کی جانب سے لگژری آئٹمزکی درآمدات پر پابندی عائد ہونے کے باعث جمعہ کو پاکستانی روپے پر امریکی ڈالر کے دباوٗ میں کمی ہوئی تھی لیکن پیر سے ایک بار پھر ڈالر کی قدر میں اضافے کا سلسلہ شروع ہوگیا ہے۔

مجموعی طور پررواں ماہ انٹر بینک میں ڈالرکی قدر میں اب تک 15 روپے 75 پیسے اضافہ ہوچکا ہے جبکہ اوپن کرنسی مارکیٹ میں ڈالر کی قدرمیں ہونے والا اضافہ 17 روپے 20 پیسے اضافہ ہوچکا ہے۔

کرنسی ڈیلرز کے مطابق ملک میں جاری سیاسی عدم استحکام اور آئی ایم ایف سے مذاکرات کے حوالے سے غیر یقینی صورتحال سے کرنسی مارکیٹ پر بھی منفی اثرات مرتب ہورہے ہیں۔