نچ پنجابن کی چوری: بالی ووڈ نے ابرارالحق کو ہی تڑی لگادی

پاکستانی گلوکارنے قانونی کارروائی کی دھمکی دی تھی

بالی ووڈ کی تازہ چوری کے جواب میں ابرارالحق کی وارننگ پر متعلقہ ادارے کا ردعمل سامنے آگیا ہے۔

گزشتہ روز دھرما پروڈکشن کے بینر تلے بننے والی فلم ‘جُگ جُگ جیو’ کے ٹریلر میں ابرار الحق کے مشہور گانے ‘نچ پنجابن’ کی نقالی سامنے آنےکے بعد گلوکار نے اپنی ٹویٹ میں اس بات کی نشاندہی کی تھی ۔

ابرارنے نچ پنجابن کے کاپی رائٹس فروخت کرنے کی تردید کرتے ہوئے لکھا تھا کہ میں نے کسی بھارتی فلم کو اپنے گانے کے حقوق فروخت نہیں کیے، گانے کے استعمال پر ہرجانے کے لیے کورٹ جانے کا حق محفوظ رکھتا ہوں۔

بالی ووڈ انڈسٹری کے بڑے فلمسازوں میں سے ایک کرن جوہرکی اس فلم میں اپنے گانے کی بلا اجازت استعمال پرابرارنے انہیں ٹیگ کرتے ہوئے کہا تھا کہ کرن جوہر جیسے پروڈیوسر کو میرا گانا کاپی نہیں کرنا چاہیے تھا، یہ میرا چھٹا گانا کاپی کیا گیاہے جس کی ہرگزاجازت نہیں دوں گا۔

اس چوری کے جواب میں کرن جوہر کی جانب سے تاحال کوئی ردعمل سامنے نہیں آیا تاہم کئی بڑٰے انٹرٹینمنٹ لیبلز کو کنٹرول کرنے والی ایجنسی مووی باکس نے ابرارالحق کی ٹویٹ پربیان جاری کیا ہے۔

مووی باکس کا دعویٰ ہے کہ ٹی سیریز کی جانب سے جُگ جُگ جیو میں نچ پنجابن کوشامل کرنے کے لیے باضابطہ طورپر لائسنس دیا گیا ہے۔

ٹویٹ میں الٹاچور کوتوال کو ڈانٹے کے مصداق دھمکی آمیزالفاظ میں کہا گیا ہے کہ، ’ کرن جوہراوردھرما موویز کو یہ گانا اپنی فلم میں استعمال کرنے کا قانونی حق حاصل ہے، اس حوالے سے ابرارالحق کا ٹویٹ توہین آمیز اورمکمل طور پرناقابل قبول ہے’۔

مووی باکس کے اس دعویٰ پر ابرارالحق نے جوابی ٹویٹ میں واضح کیا کہ انہوں نے کسی کو بھی اس گانے کے استعمال کی اجازت کا لائسنس نہیں دیا ہے، اگرکوئی ایسا دعویٰ کرہا ہے تو لائسنس پیش کرے۔

گلوکار نے لکھا کہ وہ قانونی کارروائی کریں گے۔

حال ہی میں بھارتی گلوکارہ کانیکا کپور نے بھی پاکستانی گلوکارہ حدیقہ کیانی کا مقبول ترین گیت بوہے باریاں کی نقالی کی تھی لیکن حدیقہ کی جانب سے نشاندہی پربھارتی گلوکارہ سرے سے یہ ماننے سے ہی انکاری تھیں کہ انہوں نے ایسا کیا۔

ٹائمزآف انڈیا کودیے جانےوالے انٹرویومیں کانیکا کا موقف تھا کہ انہیں علم نہیں تھا کہ ایساکوئی گانا بھی موجود ہے اور انہوں نے کسی کے کام کو کاپی کرنے کی کوشش نہیں کی۔

ABRAR UL HAQ

NACH PUNJABAN, KARAN JOHAR,

JUGGJUGG JEEYO,

Tabool ads will show in this div