عوام لوڈشیڈنگ کا عذاب سہنے کیلئے تیار ہوجائیں

اسلام آباد : عوام لوڈشیڈنگ میں کمی کے دعوؤں پر کان نہ دھریں، وزارت پانی و بجلی نے حقائق سامنے رکھ دیئے موسم گرما میں بجلی کا شارٹ فال 5 ہزار 800 میگاواٹ سے تجاوز کر سکتا ہے۔

کس نے کہا کہ گرمیوں میں بجلی دھوکا نہیں دے گی، عوام لوڈ شیڈنگ کا عذاب بھگتنے کیلئے تیار ہوجائیں، وزارت پانی و بجلی نے خبردار کردیا۔

وزارت پانی و بجلی کی دستاویز کے مطابق موسم گرما میں بجلی کی قلت 5 ہزار 822 میگاواٹ تک رہے گی، جولائی تک بجلی کی طلب 23 ہزار107 میگاواٹ جبکہ زیادہ سے زیادہ پیداوار 17 ہزار 285 میگاواٹ ہوگی، شہروں میں لوڈشیڈنگ 6 جبکہ دیہات میں 8 گھنٹے تک محدود کرنے کے دعوے بھی ہوا ہوتے نظر آرہے ہیں۔

گزشتہ سال گرمیوں میں بجلی کی زیادہ سے زیادہ پیداوار 16 ہزار800 میگاواٹ رہی تھی، جبکہ 3 سال کے دوران گرمیوں میں اوسط شارٹ فال 5 ہزار میگاواٹ تھا، رواں سال پیداوار میں اضافہ تو ہوا لیکن طلب بڑھنے کے باعث لوڈشیڈنگ کے جن کو بوتل میں بند کرنا ممکن نہیں۔ سماء