میر علی میں جھڑپ، 11 دہشت گرد مارے گئے، آج ہلاکتوں کی تعداد 71 ہوگئی، 4 اہلکار بھی شہید

ویب ڈیسک

اسلام آباد : وزیرستان کے علاقے میر علی میں فورسز سے جھڑپ میں 11 دہشت گرد مارے گئے، ایک افسر سمیت 4 سیکیورٹی اہلکار بھی شہید ہوگئے، جیٹ طیاروں کی بمباری اور جھڑپوں میں ہلاک دہشت گردوں کی تعداد 71 ہوگئی۔

آئی ایس پی آر کے مطابق وزیرستان کے علاقے میر علی میں آج دوپہر جھڑپیں ہوئیں، جن میں 11 دہشت گرد مارے گئے جبکہ کارروائی کے دوران ایک افسر سمیت 4 سیکیورٹی اہلکار بھی شہید ہوئے۔

آئی ایس پی آر کا کہنا ہے کہ آج کی کارروائیوں میں مارے گئے دہشت گردوں کی تعداد 71 ہوگئی، مرنے والوں میں القاعدہ اور طالبان کمانڈر بھی شامل ہیں جبکہ درجنوں دہشت گرد زخمی بھی ہوئے۔

واضح رہے کہ میران شاہ اور میر علی سمیت شمالی وزیرستان کے مختلف علاقوں میں علی الصباح دہشت گردوں کے اڈوں پر بمباری کی گئی، فضائی کارروائی میں القاعدہ اور طالبان کمانڈروں سمیت 60 دہشت گرد مارے گئے جبکہ 30 سے زیادہ زخمی ہوئے۔

بمباری سے بڑی تعداد میں گولہ بارود، اسلحہ اور بارودی سرنگیں بھی تباہ کر دی گئیں، دہشت گرد فاٹا، خیبر پختونخوا اور کراچی میں خودکش حملوں اور بم دھماکوں میں ملوث تھے، شمالی وزیرستان کے تمام علاقوں میں غیر معینہ مدت کیلئے کرفیو نافذ ہے۔ سماء