وفاقی کابینہ کے نام سامنے آگئے، اعلان جلد متوقع

وزیراعظم شہباز شریف کی کابینہ کے نام سامنے آگئے، پی پی چیئرمین بلاول بھٹو زرداری کو وزیر خارجہ بنانے کا فیصلہ کرلیا گیا۔ کابینہ کا باضابطہ اعلان کچھ دیر میں متوقع ہے۔

سماء نے وزیراعظم شہباز شریف کی کابینہ کے نام حاصل کرلئے، چیئرمین پیپلزپارٹی بلاول بھٹو زرداری کو وزیر خارجہ اور رانا ثناء اللہ کو وزیر داخلہ بنانے کا فیصلہ کیا گیا ہے۔

نمائندہ سماء کے مطابق مریم اورنگزیب کو وزارت اطلاعات کا قلمدان ملے گا جبکہ خواجہ آصف، خواجہ سعد رفيق اور اياز صادق بھی وفاقی کابينہ ميں شامل ہوں گے۔

عمران خان کابینہ میں شامل وزیر طارق بشیر چیمہ کو بھی ان کی پرانی وزارت، وزارت ہاؤسنگ دی جائے گی جبکہ چوہدری شجاعت حسین کے صاحبزادے چوہدری سالک حسین کو بھی وزیر بنانے کا فیصلہ کیا گیا ہے۔

 مسلم لیگ ن کے احسن اقبال اور خرم دستیگر خان بھی وفاقی کابینہ کا حصہ ہوں گے۔

ذرائع کے مطابق وفاقی کابینہ کا اعلان کچھ دیر بعد کیا جائے گا۔

وزیراعظم شہباز شریف نے اتحادیوں سے خطاب کرتے ہوئے کہا باہمی مشاورت سے آگے بڑھ رہے ہیں، کابینہ کی پہلی قسط بہت جلد سامنے آجائے گی، چند دن یا ہفتے بعد دوسری قسط بھی سامنے لائیں گے۔

ان کا مزید کہنا تھا کہ حلقوں کے مسائل بھی ترجیحی بنیادوں پر حل کرواؤں گا۔

یہ بھی پڑھیں: وفاقی کابینہ میں پیپلزپارٹی کو کتنی وزارتیں ملیں گی؟

اس سے قبل پیپلزپارٹی کے رہنماء فیصل کریم کنڈی نے دعویٰ کیا تھا کہ پی پی پی کو وفاقی کابینہ میں وزارت خارجہ سمیت 10 وزارتیں دی جائیں گی۔

واضح رہے کہ پاکستان ڈیموکریٹک موومنٹ نے عمران خان کی حکومت گرا کر شہباز شریف کو وزیراعظم منتخب کرایا، موجودہ حکومی اتحاد میں مسلم لیگ ن، پاکستان پیپلزپارٹی، جمعیت علمائے اسلام (ف)، ایم کیو ایم پاکستان، بلوچستان عوامی پارٹی، عوامی نیشنل پارٹی، بلوچستان نیشنل پارٹی سمیت 10 سے زائد جماعتیں شامل ہیں۔

ایم کیو ایم پاکستان اور بلوچستان عوامی پارٹی عمران خان حکومت میں بھی شامل تھیں، تاہم دونوں جماعتوں نے تحریک عدم اعتماد میں اس وقت کی اپوزیشن جماعتوں کا ساتھ دیا۔