مستونگ: بہن اور بھائی کو گلا دبا کر قتل کردیاگیا
رپورٹ : فیض درانی
بلوچستان کے ضلع مستونگ میں بہن بھائی کو گلہ دبا کر قتل کردیا گیا۔ لیویز نے ڈھاڈر میں کارروائی کرتے ہوئے قتل میں ملوث 2 ملزمان کو گرفتار کرلیا۔
لیویز حکام کے مطابق مستونگ کے علاقے کردگاپ میں دو بہن بھائی گزشتہ روز اپنے مال مویشی چرانے کیلئے قریبی میدانوں میں گئے اور اچانک لاپتہ ہوگئے، آج صبح ڈھونڈنے پر دونوں بچوں کی لاشیں ملیں۔
اطلاع ملتے ہی ڈپٹی کمشنر مستونگ میجر (ر) محمد الیاس کبزئی، اسسٹنٹ کمشنر کردگاپ حبیب الرحمٰن لونی سمیت لیویز اہلکار موقع پر پہنچے اور لاشوں کو پوسٹمارٹم کیلئے اسپتال منتقل کردیا۔
ڈپٹی کمشنر مستونگ میجر (ر) محمد الیاس کبزئی کی ہدایت پر اسسٹنٹ کمشنر مستونگ عطاء المنیم بلوچ نے لیویز فورس کے ہمراہ ضلع کچھی کے علاقے ڈھاڈر میں کارروائی کرتے ہوئے بچوں کے قتل میں ملوث 2 ملزمان کو گرفتار کرلیا۔
لیویز حکام کے مطابق ملزمان بچوں کو قتل کرنے کے بعد 20 بھیڑ بکریاں بھی لیکر فرار ہوگئے تھے، گرفتار دونوں افراد کو ڈھاڈر سے مستونگ منتقل کردیا گیا۔
انتظامیہ کے مطابق مقتولین کی شناخت 7 سالہ اسرار اور 10 سالہ بی بی آمنہ کے نام سے ہوئی ہے، لیویز نے مقدمہ درج کرکے قانونی کارروائی شروع کردی ہے۔
MASTUNG
CHILD MURDER
