سندھ ہائیکورٹ کاناصر جمپ پرغیرقانونی تعمیرات ختم کرانےکاحکم

سندھ ہائیکورٹ نے کورنگی کے علاقے ناصر جمپ پر چائنا کٹنگ سمیت غیر قانونی تعمیرات ختم کرانے کا حکم دے دیا۔

سندھ ہائی کورٹ میں کورنگی ناصر جمپ سے تجاوزات اور چائنا کٹنگ کے خاتمے سے متعلق درخواست کی سماعت ہوئی۔

عدالت نے استفسار کیا کہ کیا سندھ بلڈنگ کنٹرول اتھارٹی والے عدالتی حکم پر عمل درآمد نہیں کرتے۔جسٹس حسن اظہر رضوی نے ریمارکس دئیے کہ جیسے پولیس گشت کرتی ہے بلڈنگ کنٹرول اتھارٹی والے گشت کرتے ہیں، کسی کے گھر کے دروازے پر بجری کے ساتھ گدھا گاڑی نظر آئے تو اتھارٹی والے فوری پہنچ جاتے ہیں ،اتنی بڑی عمارتیں ایس بی سی اے والوں کو کیوں نظر نہیں آتی۔

عدالت نے ایس بی سی اے کو ہدایت کی کہ رپورٹ میں ذمہ دار انسپکٹراور دیگر افسران کا نام ضرور لکھیں تاکہ پتہ چلے کہ کس نے یہ غلط کام کیا ہے۔

درخواست گزار کو وکیل نے بتایا کہ عدالت اس سے قبل بھی غیرقانونی تعمیرات گرانے کا حکم دے چکی ہے،ناصر جمپ پر 180 گز کے پلاٹ کو غیرقانونی طور پر 2 حصوں میں تقسیم کر دیا گیا ہے اور نوے نوے گز کے چھوٹے پلاٹوں پر چھ چھ منزلہ عمارتیں بنائی گئی ہیں۔

درخواست گزار کی جانب سے مزید بتایا کہ تجاوزات کے خاتمے سے متعلق عدالتی حکم کو ایک ماہ سے زائد عرصہ گزر چکا ہے تاہم عمل درآمد نہیں کیا گیا۔

عدالت نےسندھ بلڈنگ کنٹرول اتھارٹی حکام پر اظہار برہمی کیا اور حکم دیا کہ ناصر جمپ پر45 روز میں کارروائی کرکے رپورٹ پیش کی جائے۔