دکان میں سوداپڑا ہوتو خریدار آتاہی ہے، فردوس عاشق اعوان

وزیراعظم کی سابق معاون خصوصی ڈاکٹر فردوس عاشق اعوان کا کہنا ہے کہ وزیراعظم کے ارد گرد ٹولے ناتجربہ کار اور مفاد پرست ہے، مرکز اور پنجاب میں سازشیں کرنے والا گینگ ایک ہی تھا، دکان میں سودا پڑا ہو تو خریدار آتا ہی ہے۔

وزیراعظم کی سابق معاون خصوصی فردوس عاشق اعوان کو سماء منظر عام پر لے آیا۔ سماء کو خصوصی انٹرویو میں معاشی عدم استحکام کے بعد سیاسی بحران کی پیشگوئی کردی، حکمران جماعت میں اندرونی لڑائیوں اور سازشوں کا پردہ بھی چاک کیا۔

ان کا کہنا ہے کہ پی ٹی آئی کو خطرہ باہر سے نہیں اندر سے ہے، مرکز اور پنجاب میں سازشیں کرنے والا گینگ ایک ہی تھا، کچھ لوگوں نے پارٹی مفادات کو ذاتی مفاد کی بھینٹ چڑھادیا۔

منظر سے غائب ہونے کے سوال پر انہوں نے کہا کہ کوشش کی کہ بدترین صورتحال میں بھی بہترین پرفارم کروں لیکن شاید لیڈرشپ کو اس سے بہتر کی تلاش تھی، میرے سینے میں بہت راز ہیں وزیراعظم کی مشکلات نہیں بڑھانا چاہتی۔

فردوس عاشق اعوان نے وزیراعظم عمران خان کے اردگرد موجود ٹولے کو ناتجربہ کار اور مفاد پرست کہہ دیا۔ انہوں نے وزراء میں پرفارمنس ایوارڈز کی تقسیم کو قبل از وقت قرار دیتے ہوئے کہا کہ میڈل اور ٹرافیاں تو میچ ختم ہونے پر ملتی ہیں، میچ کے دوران نہیں۔

پی ٹی آئی رہنماء نے پی ڈی ایم کی جانب سے عدم اعتماد تحریک سے متعلق کہا کہ اپوزیشن کی پھرتیاں میڈیا کی توجہ حاصل کرنے کی کوششں ہیں۔

دیگر جماعتوں کے رابطے کے سوال پر ان کا کہنا تھا کہ دکان میں سودا پڑا ہو تو کوئی نہ کوئی خریدار تو آتا ہی ہے، پاکستان تحریک انصاف کو خطرہ باہر سے نہیں اندر سے ہے۔