سول ایوی ایشن اتھارٹی نے اسلام آباد ایئرپورٹ پر بیرون ملک جانے والے مسافروں کو کم سے کم 4گھنٹے قبل ایئر پورٹ پہنچنے کی ہدایت کر دی۔

سی اے اے نے ہدایت کی ہے کہ دبئی، شارجہ اور ابوظبی جانے والے مسافر پرواز سے 5گھنٹے قبل ایئر پورٹ آئیں۔

ہدایت کی گئی کہ متحدہ عرب امارات جانے والے مسافروں کی ٹیسٹ رپورٹ ایک ساتھ جاری نہ کی جائے جبکہ 30مسافروں کے ٹیسٹ رپورٹ جاری کرکے بورڈنگ ایریا میں جانے کے احکامات دیے گئے ہیں۔

ایئرپورٹ منیجر عدنان خان کا کہنا ہے کہ ایئرلائن کاؤنٹر بند کرنے سے پہلے باقاعدہ طور پر اعلان کیا جائے گا۔

انہوں نے بتایا کہ سیکیورٹی چیک کے لیے اے ایس ایف کی نفری میں بھی اضافہ کر دیا گیا ہے، بیرون ملک جانے والے مسافروں کی سیکیورٹی کوئیک رسپانس کے تحت چیک ہوگی۔

واضح رہے کہ ایئرپورٹ پر مسافروں کے رش کے معاملے پر سول ایوی ایشن اتھارٹی نے اقدامات کیے ہیں۔