نورجہاں سے متعلق بیان پرعلی عظمت نے خاموشی توڑ دی
پاکستان کے معروف گلوکار علی عظمت نے ملکہ ترنم نور جہاں سے متعلق دئیے گئے اپنے بیان پر وضاحت پیش کردی۔
گلوکار علی عظمت نے انسٹاگرام پر اپنا ویڈیو بیان پوسٹ کرتے ہوئے کہا کہ سوشل میڈیا پر میرے حوالے سے ایک مہم چلائی جارہی ہے جس میں میرا نور جہاں سے مقابلہ کیا جارہا ہے، جس نے بھی یہ ویڈیو پوسٹ کی ہے پوری نہیں کی بلکہ ایڈیٹ کرکے کی گئی ہے۔
علی عظمت نے کہا کہ احمد علی بٹ اور حنا درانی میری فیملی ہیں میں ان سے بہت پیار کرتا ہوں اور ان کی عزت بھی کرتا ہوں ناصرف یہ بلکہ ان سے زیادہ میں میڈم نور جہاں سے پیار کرتا ہوں۔
انہوں نے کہا کہ نور جہاں کے حوالے سے جو میں نے بات کی ہے وہ بات بالکل سچ ہے، میں نے اپنے بچپن کے بارے میں بات کی ہے اس زمانے میں صرف پی ٹی وی چلتا تھا اس وقت نور جہاں کی پریزنٹیشن اچھی نہیں تھی ہمیں دیکھنے کو جو ملتا تھا اس حوالے سے اپنی رائے دی تھی۔
گلوکار نے مزید کہا کہ میوزک ہمارے ہاں جتنا بھی آیا ہے وہ مغربی کلچر کا حصہ ہے، مگر پی ٹی وی پر نور جہاں کو جیسے دکھایا جاتا وہ بالکل اچھا نہیں لگتا تھا، مگر بعد میں جب ہم بڑے ہوئے تو ہمیں نورجہاں سے زیادہ پسند ہی کوئی نہیں تھا، اس حوالے سے مختلف فنکار بھی گواہی دیں گے کہ ہم نور جہاں اور ان کی گائیکی کو بہت پسند کرتے تھے۔
ملکہ ترنم نورجہاں کی’تضحیک’پرعلی عظمت تنقیدکی زد میں
علی عظمت کا کہنا تھا کہ نور جہاں اس وقت بڑھاپے میں تھیں اور ہم سمجھتے تھے کہ انہیں دیکھنا ہمارے لیے ضروری نہیں ہے۔
واضح رہے کہ علی عظمت نے ایک ٹاک شو میں ملکۂ ترنم کی ظاہری شکل کے بارے میں نازیبا ریمارکس دیے تھے۔
NOOR JAHAN
Ali Azmat
