کراچی میں آج بھی سمندری ہوائیں بند رہیں گی

محکمہ موسمیات کا کہنا ہے کہ کراچی میں آج بھی درجہ حرارت 39 ڈگری تک جانے کا امکان ہے۔

ترجمان محکمہ موسمیات کے مطابق صبح کے اوقات میں کراچی میں ہوا میں نمی کا تناسب 50 فیصد رہا۔ شہر میں آج بھی گرمی برقرار اور سمندری ہوائیں معطل رہیں گی۔ میٹ آفس کے مطابق آج شام سمندری ہوائیں بحال ہونے کا امکان ہے۔

واضح رہے کہ گزشتہ روز ڈائریکٹر محکمہ موسمیات سردار سرفراز کی جانب 17 ستمبر سے سمندری ہوائیں بحال ہونے کا امکان ظاہر کیا گیا تھا۔

اپنے ایک بیان میں سردار سرفراز کا کہنا تھا کہ گجرات میں موجود ہوا کا کم دباؤ سمندر کی جانب بڑھ گیا ہے۔ ہوا کے کم دباؤ کے پھیلاؤ کے باعث کراچی کی سمندری ہوائیں معطل ہیں۔

دوسری جانب محکمہ موسمیات نے شمال مشرقی پنجاب، پوٹھوہار اور کشمیر میں چند مقامات پر گرج چمک اور تیز ہواؤں کے ساتھ بارش کا امکان ظاہر کیا ہے۔