کراچی شرقی اور حیدرآباد میں سخت اقدامات کاحکم

کرونا وائرس کے بڑھتے کیسز پر وزیر اعلیٰ سندھ نے کراچی شرقی اور حیدراباد میں سخت اقدامات کی ہدایت کردی ہے۔

وزیراعلیٰ سندھ سید مراد علی شاہ کی زیر صدارت کرونا وائرس ٹاسک فورس کا اہم اجلاس پیر 3 مئی کو وزیراعلیٰ ہاؤس میں ہوا۔

اجلاس میں صوبائی وزراء، ڈاکٹر عذرہ پیچوہو، سعید غنی، جام اکرام اللہ دھاریجو، ناصر شاہ، چیف سیکریٹری ممتاز شاہ، مشیر مرتضیٰ وہاب، قاسم سومرو، آئی جی سندھ، ایڈیشنل چیف سیکریٹری، پرنسپل سیکریٹری، کمشنر کراچی، سیکریٹری فنانس، سیکریٹری ایجوکیشن، سیکریٹری صحت، ڈاکٹر باری، ڈاکٹر فیصل، 5 کور، رینجرز، ڈبلیو ایچ او کے نمائندوں نے شرکت کی۔

حکام کی جانب سے اجلاس کے شرکا کو بتایا گیا کہ صوبے بھر میں 5.4 فیصد کرونا کے کیسز ہیں۔ سندھ میں کرونا وائرس سے مریضوں کی صحت یابی کی شرح 93 فیصد ہے اور شرح اموات 1.6 فیصد ہے۔

حکام کے مطابق اپریل میں 154 مریض کرونا سے انتقال کرگئے۔ اس موقع پر بریفنگ میں بتایا گیا کہ گزشتہ 7 دنوں میں کراچی میں 10.42 فیصد، حیدرآباد میں 14.52 فیصد کیسز سامنے آئے ہیں، جب کہ سکھر میں 5.48 فیصد کیسز ظاہر ہوئے ہیں۔

وزیراعلیٰ نے تشویش کا اظہار کرتے ہوئے کہا کہ ایس او پیز کی خلاف ورزی ہو رہی ہے، جس پر زیادہ کیسز رپورٹ ہو رہے ہیں۔ اس موقع پر وزیراعلیٰ سندھ نے پولیس اور کمشنر کراچی کو ہدایت دی کہ سختی سے ایس او پیز پر عمل کروایا جائے۔ وزیراعلیٰ سندھ نے وزراء کو شہر کا دورہ کرنے کی بھی ڈیوٹی لگائی۔

مراد علی شاہ کا کہنا تھا کہ وزراء کے دوروں سے ایس او پیز پر عمل کرنے میں مدد ملے گی، جب کہ زیادہ کیسز سامنے آنے پر حیدرآباد اور کراچی شرقی میں مزید سخت اقدامات کرنے کا فیصلہ کیا گیا۔