پنجاب 10لاکھ سے زائد کرونا ویکسین خریدے گا، عثمان بزدار

وزيراعلیٰ پنجاب عثمان بزدار کا کہنا ہے کہ کرونا ویکسین خریدنے کے لیے ڈیڑھ ارب روپے کے فنڈز مختص کر رہے ہیں جبکہ صوبائی حکومت شہریوں کو ویکسین لگانے کے لیے 10 لاکھ سے زائد ڈوز خریدے گی۔

بدھ 7اپریل کو وزیراعلیٰ پنجاب عثمان بزدار کی زیرِ صدارت اجلاس ہوا جس ميں کرونا صورتحال اور ویکسینیشن کے عمل پر پیش رفت کا جائزہ ليا گيا۔

اجلاس میں ویکسینیشن سینٹرز کا دائرہ کار بتدریج بڑھانے کا فیصلہ کيا گيا جبکہ کرونا ویکسینیشن کے لیے مزید سینٹرز بھی قائم ہوں گے۔ شہری 1166 پر شناختی کارڈ کا نمبر بھیج کر رجسٹریشن کروا رہے ہیں۔

وزيراعلیٰ پنجاب کا کہنا تھا کہ پنجاب کے ہر شہری کو کرونا سے بچانے کے لیے تمام ممکنہ اقدامات کریں گے لیکن کرونا سے مکمل نجات حاصل کرنے کے لیے عوام کا بھرپور تعاون بے حد ضروری ہے۔

وزيراعلیٰ کے مطابق کرونا مریضوں کے لیے آکسیجن کی فراہمی یقینی بنانے کے لیے وفاق سے بھی رابطہ ہے۔