صادق سنجرانی کی یوسف رضا گیلانی سے ملاقات

چیئرمین سینیٹ صادق سنجرانی نے اسلام آباد میں پاکستان ڈیموکریٹک موومنٹ کے نومنتخب سینیٹر یوسف رضا گیلانی سے ملاقات کرکے کامیابی پر مبارکباد دی۔

وزیراعظم نے سینیٹ کی چیئرمین شپ کیلئے دوبارہ صادق سنجرانی کو نامزد کردیا ہے جس کے بعد انہوں نے اپنی سیٹ کا دفاع کرنے کیلئے سینیٹرز سے رابطے تیز کردیے ہیں۔ صادق سنجرانی نے اسپیکر پنجاب اسمبلی کو ٹیلی فون کیا۔ چوہدری پرویز الہٰی نے حمایت کی یقین دہانی کرا دی۔

صادق سنجرانی کا کہنا ہے کہ میں اور جام کمال اتحادیوں کے ساتھ رابطے میں ہیں۔ پرویز الہیٰ نے یقین دلایا ہے کہ وہ خود چیئرمین سینٹ کی انتخابی مہم چلائیں گے۔

چیئرمین سینیٹ نے ممکنہ حریف یوسف رضا گیلانی سے بھی رابطہ کرکے سینیٹر منتخب ہونے پر مبارکباد دی۔

بعد ازاں میڈیا سے گفتگو کرتے ہوئے صادق سنجرانی نے کہا کہ یوسف رضا گیلانی سے ووٹ کے حوالے سے کوئی بات نہیں ہوئی۔ ان کے ساتھ کام کیا اور بہت کچھ سیکھا ہے۔ ضرورت پڑی تو میں پھر ان کے پاس آجاؤں گا۔

صادق سنجرانی نے امیر جماعت اسلامی سراج الحق سے بھی ملاقات کی اور چیئرمین کے انتخاب کے دوران ووٹ دینے کی درخواست کی۔ بعد ازاں صادق سنجرانی نیشنل پارٹی کے پارلیمانی لیڈر میر کبیر شاہی سے ملنے پہنچے اور حمایت مانگی۔ میزبانوں نے مشاورت کیلئے وقت مانگ لیا۔ ایم کیو ایم رہنماؤں سے ملاقات جمعہ پانچ مارچ کو طے ہوئی ہے۔