پی ایس ایل فائنل کل ہوگا، دونوں کپتان جیت کیلئے پرعزم

 پاکستان سپر لیگ 5 کے فاتح کا فیصلہ کل (منگل کو) لاہور قلندرز اور کراچی کنگز کے درمیان ٹاکرے میں ہوگا۔ کراچی کنگز کے کپتان عماد وسيم کا کہنا ہے کہ ہم یہ فائنل ڈین جونز کیلئے کھیلیں گے، ہمارے ڈریسنگ روم میں ان کی شخصیت والد کی طرح تھی۔ لاہور قلندر کے کپتان سہيل اختر کا کہنا ہے کہ ہم اپنے مداحوں کو پاکستان سُپر لیگ کی ٹرافی کی صورت میں بہترین تحفہ دینا چاہتے ہیں۔

نيشنل اسٹیڈیم کراچی میں ہونیوالے اس تاریخی فائنل میں روایتی حریف لاہور قلندرز اور کراچی کنگز کی ٹیمیں مدمقابل ہوں گی، دونوں ٹیمیں پہلی مرتبہ ایونٹ کے فائنل میں پہنچی ہیں۔

کرونا وائرس کی عالمی وباء کے باعث 8 ماہ سے تعطل کا شکار پاکستان سپر لیگ 5 کے دونوں کپتانوں نے ایونٹ کے فائنل میں شاندار کارکردگی کا مظاہرہ کرنے کے عزم کا اظہار کیا ہے۔

کراچی کنگز کے کپتان عماد وسیم کا کہنا ہے کہ ہم نے کوالیفائر میں بہت اچھی کرکٹ کھیلی تاہم میچ کا اختتام بہتر نہ کرسکے، اسکواڈ میں تمام کھلاڑی باصلاحیت ہیں، ہم فائنل میں بہتر کھیل پیش کرنے کی کوشش کریں گے۔

پاکستان سپرلیگ:لاہورقلندرزنےملتان سلطانز کوہراکرفائنل کیلیےکوالیفائی کرلیا

انہوں نے کہا کہ ہم یہ فائنل ڈین جونز کیلئے کھیلیں گے، وہ ہمارے ڈریسنگ روم میں والد کی حیثیت رکھتے تھے، ہم یہ ٹرافی جیت کر انہیں خراج عقیدت پیش کرنا چاہتے ہیں۔

عماد وسیم کا مزید کہنا تھا کہ کراچی کنگز کے اسکواڈ پر فائنل کا کوئی اضافی دباؤ نہیں، ہمارے لئے یہ بالکل ایک نئے میچ کی طرح ہے، کوشش کریں گے کہ یہاں بہترین کارکردگی کا مظاہرہ کرسکیں۔

لاہور قلندرز کے کپتان سہیل اختر نے بھی جیت کے عزم کا اظہار کیا، ان کا کہنا ہے کہ ایونٹ کے فائنل میں پہنچنا ہمارے لئے ایک بڑی کامیابی ہے، ہم پانچ سال سے اس دن کیلئے محنت کررہے تھے، ہم فائنل میں بھی شاندار کھیل پیش کریں گے۔

پی ایس ایل5: کراچی کنگز فائنل میں پہنچ گئی

سہیل اختر نے کہا کہ ہمارے فینز نے مسلسل 5 سال ہمیں سپورٹ کیا، اب ہم  پی ایس ایل فائیو کی ٹرافی اٹھا کر انہیں بہترین تحفہ دینا چاہتے ہیں۔

پی ایس ایل کی تاریخ میں دونوں ٹیموں کے درمیان کھیلے گئے میچ میں کراچی کنگز کو لاہور قلندرز کیخلاف برتری حاصل ہے، 10 مقابلوں میں 6 مرتبہ جیت کراچی کنگز جبکہ 3 بار لاہور قلندرز کے حصے میں آئی۔

رواں سیزن میں لاہور قلندرز اور کراچی کنگز دو مرتبہ مدمقابل آئیں، دونوں ٹیموں نے اپنے ہوم گراؤنڈز پر ایک دوسرے کیخلاف کامیابی حاصل کی۔