زندہ قوميں اپنے شہداء کو کبھی نہيں بھولتيں،آرمی چیف

دشمن کے خلاف سينہ سپر جنرل قمر جاويد باجوہ شہداء کے اہل خانہ کا حوصلہ بڑھانے اور اُن کے سروں پر دست شفقت رکھنے ميں بھی پيش پيش نظر آتے ہيں۔ کچھ مناظر آپ کو دکھاتے ہيں۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ بدھ 7 اکتوبر کو اسکردو اور گلگت کا دورہ کیا اور کرنل مجیب الرحمان شہید کے گھر گئے۔ اسکردو پہنچنے پر کور کمانڈر راول پنڈی لیفٹیننٹ جنرل اظہر عباس نے آرمی چیف کا استقبال کیا۔ انہوں نے شہید کے اہل خانہ سے ملاقات کی۔ اس موقع پر آرمی چیف کے ساتھ ان کی اہلیہ بھی تھیں۔

آرمی چیف جنرل قمر جاوید باجوہ نے کہا ہے کہ دہشت گردی کے خلاف ہماری جنگ پائیدار امن اور استحکام کے آنے تک جاری رہے گی۔

آرمی چیف جنرل قمر جاوید باجوہ نے کرنل مجیب الرحمان شہید کے اہل خانہ سے تعزیت کرتے ہوئے شہید کے درجات کی بلندی کیلئے دعا کی۔ ان کا کہنا تھا کہ ہمارے افسروں اور جوانوں کی قربانیاں رائیگاں نہیں جائیں گی۔

بعد ازاں آرمی چیف کو کنٹرول لائن پر تعینات افسروں اور جوانوں کی تیاریوں کے حوالے سے بریفنگ دی گئی۔ گلگت کے دورے کے دوران آرمی چیف نے جدید ترین سافٹ ویئر ٹیکنالوجی پارک کا افتتاح کیا اور ان کی کوششوں کو سراہا۔

پاک فوج کے شعبہ تعلقات عامہ کے ڈائریکٹر جنرل کے مطابق سافٹ ویئر پارک دفاعی کمیونیکیشن کے شعبہ میں نوجوانوں کی صلاحیت بڑھانے میں اہم کردار ادا کرے گا۔ آرمی چیف جنرل قمر جاوید باجوہ نے خراب موسمی حالات کے باجود افسروں اور جوانوں کے بلند جذبے کو سراہتے ہوئے کہا کہ اس طرح کے دور دراز کے علاقوں میں سافٹ ویئر پارک ڈیجیٹلائزیشن کی جانب ایک حوصلہ مند قدم ہے۔