پاکستان سےسالانہ37ملین ایکڑفٹ پانی بحیرہ عرب میں ضائع ہوجاتاہے

محکمہ موسمیات نے بتایا ہے کہ ہرسال پاکستان سے سالانہ اوسط 37 ملین ایکڑ فٹ پانی بحیرہ عرب میں جاگرتا ہےجو پاکستان کے بڑے ڈیموں سے بھی کئی گنا زیادہ ہے۔اِس سال یہ پانی 50 ملین ایکڑ فٹ تک ضائع ہوگا۔

ترجمان محکمہ موسمیات ڈاکٹرخالدمحمود نے سماء سے بات کرتے ہوئے بتایا یے کہ پاکستان کی آبی ضروریات کوپورا کرنے والے 2 بڑے ڈیم تربیلا اور منگلا ہیں۔ ان ڈیموں میں پانی کا ذخیرہ 13 ملین ایکڑ فٹ سے بھی کم ہےمگر اس سے دگنا پانی یعنی 37 ملین ایکڑ فٹ ہرسال ضائع ہوجاتا ہے۔

اس سال 2010 کے بعد مون سون بارشیں 100 ملی میٹر تک زیادہ ریکارڈ کی گئیں۔ضرورت کے مطابق ڈیم نہ ہونے سےجہاں ایک طرف پانی ضائع ہو رہا ہے وہیں سیلاب کی صورت میں میدانی علاقوں میں اسٹرکچر کو نقصان پہنچ رہا ہے۔

گزشتہ تین دہائیوں میں 91 ملین ایکڑ فٹ جبکہ 2010 میں 50 ملین ایکڑ فٹ سے زائد پانی سیلاب کی صورت میں تباہی مچانے کے بعد سمندر میں گر کر ضائع ہو چکا ہے۔