نیب کا سلمان شہباز کو انٹرپول کے ذریعے واپس لانے کا فیصلہ

قومی احتساب بیورو نے سلمان شہباز کو انٹرپول کے ذریعے برطانیہ سے واپس لانے کا فیصلہ کیا ہے۔

قومی احتساب بیورو ( نیب ) کے مطابق قائد حزب اختلاف شہباز شریف کے بیٹے سلمان شہباز کو انٹر پول کے ذریعے برطانیہ سے پاکستان لانے کا فیصلہ کیا گیا ہے۔ نیب کے مطابق سلمان شہباز شریف خاندان کے خلاف منی لانڈرنگ کیس میں اشتہاری اور مفرور ہیں۔

نیب کے مطابق ملزم سلمان شہباز کو واپس وطن لا کر قانون کے سامنے پیش کیا جائے گا۔ سلمان شہباز کے ناقابل ضمانت وارنٹ بھی جاری ہوچکے ہیں۔

نیب سلمان شہباز کی واپسی کے لیے برطانوی نیشنل کرائم ایجنسی سے درخواست کرے گا اور استدعا کی جائے گی کہ سلمان شہباز کو برطانوی قانون کے مطابق انٹرپول کے ذریعہ ڈیپورٹ کیا جائے۔