مریم اورنگزیب نےعمران خان کولاپتا وزیراعظم قرار دیدیا

مریم اورنگزیب نے حکومت سے مطالبہ کرتے ہوئے کہا ہے کہ وزیراعظم کی گمشدگی کا اشتہار شائع کیا جائے۔

ترجمان مسلم لیگ ن مریم اورنگزیب نے وزیر اعظم عمران خان کو عوامی ایشوز پر ہدف تنقید بناتے ہوئے کہا کہ 1 کروڑ نوکریاں اور 50 لاکھ گھر دینے کا وعدہ کرنے والے وزیراعظم لاپتا ہیں۔ آئی ایم ایف جانے کے بجائے خود کشی کا اعلان کرنے والے اور بھیک مانگنے پر موت کو ترجیح دینے والے وزیراعظم لاپتا ہیں۔

مریم اورنگزیب نے کہا کہ طیارہ حادثے میں جاں بحق ہونے والوں کی میتیں نہ ملنے پر ان کے پیارے پوچھ رہے ہیں کہ وزیراعظم کہاں ہیں؟، طیارہ حادثہ کی تحقیقات پر عوام سوال پوچھ رہے ہیں۔

انہوں نے کہا کہ ٹڈی دل سے فصلیں تباہ ہوگئیں، کرونا مریضوں اور اموات کی شرح بڑھتی جا رہی ہے اور وزیراعظم کا کچھ پتا نہیں، حکومت کے پاس صورت حال سے نمٹنے کی کوئی حکمت عملی موجود نہیں، 5 سال سے فارن فنڈنگ کا کیس جاری لیکن احتساب خود سے شروع کرنے والے وزیراعظم کا کچھ پتا نہیں۔

مریم اورنگزیب کا مزید کہنا تھا کہ خفیہ بینک اکاؤنٹس برآمد ہوگئے، بی آر ٹی کے 126 ارب کے کھڈے کھودے گئے، 10 ارب درخت لگا دیئے ہیں لیکن لیکن زمین پر یہ درخت لاپتا ہیں، خیبر پختونخوا کے احتساب کمیشن کو 7 سال سے تالا لگا کر عمران صاحب لا پتا ہیں۔