پاکستان کےنامورگلوکارکرونامتاثرین کی مدد کیلئےاکٹھےہوگئے

عالمی وبا قرار پانے والے کرونا وائرس سے نمٹنے کی کاوشوں میں پاکستان کے نامور گلوکار بھی اپنا حصہ ڈال رہے ہیں۔

ملک کے معروف گلوکار اس وائرس سےمتاثرہ افرادکی مدد کیلئے آن لائن پروگرام کے ذریعے فنڈزجمع کریں گے۔

اس آن لائن پروگرام کو"کووِڈ 19 ورچوئل فنڈ ریزنگ" کا نام دیا گیا ہے جس کی تمام ترآمدنی کرونا سے متاثرہ افراد کی مدد کیلئے دی جائےگی۔

فنڈ ریزنگ ویب سائٹ پردی گئی تفصیلات میں کہا گیا ہے کہ رمضان المبارک کے بابرکت مہینے کی وجہ سے یہ کنسرٹ نہیں بلکہ اسے حمد ونعت اورصوفی پروگرام کا نام دیا جارہا ہے۔

 دس مئی بروز اتوارکو ہونے والے اس فنڈ ریزنگ ورچوئل صوفی پروگرام مں گلوکارعلی ظفر، رفاقت علی خان،علی سیٹھی، ہارون ، استاد شفقت امانت علی، خرم اقبال، جنید یوسف اورعلی شیرشرکت کریں گے، جن کی ویڈیو کا لنک 10 ڈالر (پاکستانی روپوں میں تقریبا 1600روپے) کی سبسکرپشن پر دیا جائے گا۔

گلوکار ہارون نے اس حوالے سے اپنی ٹویٹ میں کہا کہ وہ بے حد پرجوش ہیں، اتوار کو ہونے والے اس کنسرٹ میں پاکستان کے بڑے نام پرفارم کررہے ہیں" ۔

Super excited to announce an incredible virtual charity covid19 concert taking place on Sunday 10th May. With some of Pakistan’s biggest stars. I’ll be performing too. Go now to https://t.co/2utsU2alaa to register and receive the video link. #concert #virtualconcert pic.twitter.com/zddEUur1uR

— Haroon (@TheRealHaroon) May 6, 2020

ہارون نے تمام پڑھنے والوں سے کہا کہ وہ ابھی رجسٹریشن کروا کر اس پروگرام کا ویڈیو لنک حاصل کریں۔

ویب سائٹ پرمزید کہا گیا ہے کہ "کرونا وائرس نے ہمیں ایک دوسرے سے دورکردیا ہے لیکن اس کی وجہ سے آپ خود کو ان سے دور نہ کریں جنہیں اس وقت ہماری مدد کی سب سے زیادہ ضرورت ہے"۔

پاکستان میں کرونا وائرس کا پہلا کیس 26 جنوری کو رپورٹ ہوا تھا جس کے بعد سے اب تک یہ تعداد 25 ہزارتک پہنچ چکی ہے جبکہ یہ خبرفائل کرنے تک ملک بھر میں کرونا وائرس سے متاثرہ 599 افراد جان کی بازی ہار چکے ہیں۔