Technology

آئی ٹی یو نے پاکستان کو جی4 کا درجہ دےدیا

ایشیا پیسیفک کی 8فیصد ریاستیں شامل ہیں
Apr 23, 2020
[caption id="attachment_1903282" align="alignnone" width="800"] فوٹو: سماء ڈیجیٹل[/caption]

بین الاقوامی ٹیلی کمیونیکیشن یونین (آئی ٹی یو) نے پاکستان کو فورتھ جنریشن ریگولیٹر (جی 4) کا درجہ دے دیا اور پاکستان اس مقام کو حاصل کرنے والا جنوبی ایشیا کا پہلا ملک بن گیا ہے۔ ایشیا پیسیفک کے 38 ممالک میں سے، صرف 8فیصد ریاستیں ہی جی4 کی حیثیت حاصل کرنے میں کامیاب ہیں۔

آئی ٹی یو کی رپورٹ ’’گلوبل آئی سی ٹی ریگولیٹری آؤٹ لک 2020 (جی آئی آر او)‘‘ کے مطابق، پاکستان نے 100 میں سے 88 نمبر حاصل کیے جس کا مطلب یہ ہے کہ پاکستان کے آئی سی ٹی ریگولیشنز معاشی اور معاشرتی پالیسی کے اہداف پر مشتمل ہیں۔ پاکستان پورے ایشیا پیسیفک خطے میں سرفہرست پہلے پانچ ریگولیٹرز میں شامل رہا جبکہ عالمی درجہ بندی میں 48 ویں نمبر پہ رہا۔

جی آئی آر او 193 ممالک کی طرف سے فراہم کردہ اعلی کوالٹی ڈیٹا پر مشتمل ہے جو کہ ’’آئی سی ٹی ریگولیٹری ٹریکر‘‘ کی بنیاد ہے۔ آئی ٹی یو کا تیار کردہ ٹریکر شواہد پر مبنی ایک ٹول ہے جس کے ذریعے فیصلہ سازوں اور ریگولیٹرز کو آئی سی ٹی ریگولیشن کے ارتقاء کی نگرانی کرنے میں مدد ملتی ہے۔

رپورٹ کے مطابق پاکستان نے ریگولیٹری اتھارٹی کےلئے 20 میں سے 20 نمبر حاصل کیے، ریگولیٹری مینڈیٹ میں 22 میں سے 19نمبر ریگولیٹری رجیم میں 30 میں سے 22 اور مسابقتی فریم ورک کےلئے 28 میں سے 27 نمبر حاصل کیے۔ رپورٹ میں ’’باہمی تعاون کے ساتھ ریگولیشن‘‘ کی جانب پاکستان کے سفر کو خصوصی طور پر اجاگر کیا گیا ہے۔

پاکستان ٹیلی کمیونیکیشن اتھارٹی (پی ٹی اے) پاکستان میں ڈیجیٹل تبدیلی اور سماجی و معاشی فوائد کے پیش نظر نئے بین الاقوامی بینچ مارک کے تحت صارفین کے مفادات کے تحفظ اور عوامی نجی تعاون کے فروغ کے لئے مسلسل کوشاں ہے۔

Tabool ads will show in this div