را کا مبینہ ایجنٹ پولیس اہلکار گرفتار
کراچی کے علاقے گلستان جوہر میں ایس آئی یو پولیس اور حساس ادارے نے کارروائی کرتے ہوئے بھارتی خفیہ ایجنسی "را" کیلئے مبینہ طور پر کام کرنے والے کراچی پولیس کے اہل کار کو گرفتار کرلیا۔
پولیس کے مطابق را کیلئے کام کرنے والا گرفتار اسسٹنٹ سب انسپیکٹر (اے ایس آئی) شارع فیصل تھانے میں تعینات تھا۔ ملزم کو محمود صدیقی گروپ کی جانب سے بھاری رقم فراہم کی جارہی تھی۔ گرفتار پولیس اہلکار دہشت گردی کی کارروائیوں میں بھی ملوث رہا ہے۔
پولیس کا کہنا ہے کہ اہلکار ٹارگٹ کلرز کی ٹیم کا اہم رکن بتایا جاتا ہے۔ ملزم اہلکار ایم کیوایم لندن سے وابستہ ہے۔ اے ایس آئی گلستان جوہر کا رہائشی ہے۔ ملزم کے قبضے سے 2 دستی بم بھی برآمد کیے گئے ہیں۔ ملزم سے مزید تحقیقات شروع کردی گئی ہیں۔
واضح رہے کہ اے ایس آئی کی گرفتاری گزشتہ روز گلستان جوہر کے علاقے سے گرفتار ملزمان کی نشاندہی پر کی گئی ہے۔
KARACHI OPERATION
IBOs
