پاکستان ميں چین کی ٹریول ہسٹری کا ایک بھی مریض نہیں،ظفرمرزا

معاون خصوصی برائے صحت ڈاکٹر ظفر مرزا کا کہنا ہے کہ چین نے پبلک ہیلتھ کی تاریخ میں ایک نیا باب رقم کیا ہے، ہمارے پاس چین کی ٹریول ہسٹری کا ایک بھی مریض نہیں، چینی شہریوں کو پاکستان کے سفر سے قبل 14 روز قرییطینہ کرنا احسن اقدام تھا۔

اتوار کے روز چین کے ڈاکٹروں کے وفد نے نیشنل انسٹی ٹیوٹ ہیلتھ اسلام آباد کا دورہ کیا۔ جہاں ڈاکٹر ظفر مرزا اور دیگر حکام نے انہیں پاکستان کے اقدامات اور بچاؤ پر تفصیلی بریفنگ دی۔

ای ڈی این آئی ایچ نے چین کے ڈاکٹرز کو خوش آمدید کیا۔ وفد میں چین میں پاکستان کے سفیر بھی موجود تھے۔ اس موقع پر خطاب کرتے ہوئے معاون خصوصی ڈاکٹر ظفر مرزا کا کہنا تھا کہ چین کے طبی عملے کی آمد حوصلہ افزا، کرونا کیخلاف تعاون پر شکر گزار ہیں۔ کرونا وائرس سے نمٹنے کیلئے چینی اقدامات قابل تعریف ہیں، پاکستان سمیت پوری دنیا ان کی شکر گزار ہے، وائرس کی روک تھام کے حوالے سے دنیا نے چین سے بہت کچھ سیکھا۔

ڈاکٹر ظفر مرزا نے کہا کہ اگر چین نے کرونا کے خلاف اقدامات نہ کیے ہوتے تو دنیا زیادہ خطرے میں ہوتی، چین نے پبلک ہیلتھ کی تاریخ میں ایک نیا باب رقم کیا ہے، 60 ملین لوگوں کو قرنطینہ میں رکھ کر تاریخ رقم کی ہے، صحت کی پالیسیز کا اس قدر موثر عملدرآمد اس سے پہلے کبھی نہیں دیکھا گیا۔

معاون خصوصی کا مزید کہنا تھا کہ ڈائیگوسنک کٹس یا حفاظتی سامان سب کچھ فراہم کیا گیا ہے، ہمارے پاس چین کی ٹریول ہسٹری کا ایک بھی مریض نہیں، چینی شہریوں کو پاکستان کے سفر سے قبل 14 روز قرییطینہ کرنا احسن اقدام تھا۔ ہم نے یہ بھی طے کیا کہ ووہان سے اپنے طلبا کو نہیں نکالیں گے، یہ مشکل فیصلہ تھا لیکن چینی تجاویز پر عمل کیا۔ چین نے ہمارے طلباء کا خیال رکھا، اب طلباء ہمارا شکریہ ادا کر رہے ہیں۔ چینی ماہرین سے 2 دن کی ٹریننگ میں بہت کچھ سیکھ سکیں گے۔