پشاور میں نیا پاکستان ہاؤسنگ اسکیم عنقریب لانچ ہوگی

خیبرپختونخوا حکومت نے پشاور میں جون کے مہینے سے نیا پاکستان ہاوسنگ سکیم پر باقاعدہ کام کے آغاز کا اعلان کیا ہے جبکہ رجسٹریشن 15 مارچ سے شروع ہوگی۔

محکمہ ہاؤسنگ سے جاری بیان کے مطابق پشاور میں نیا پاکستان ہاؤسنگ اسکیم کے تحت پہلے مرحلے میں سوڑیزئی کے علاقے میں 16 ہزار سستے گھر تعمیر کئے جائیں گے۔ اسکیم سے فائدہ اٹھانے کے خواہش مند افراد 15 مارچ سے شروع کئے جانے والے مہم میں ممبرسازی کرسکتے ہیں جبکہ گھروں پر تعمیراتی کام کا آغاز جون سے ہوگا۔

اسلام آباد میں پاکستان ہاؤسنگ فاونڈیشن کی جانب سے منعقدہ اجلاس کے دوران خیبرپختونخوا کے محکمہ ہاؤسنگ کے سیکریٹری داود خان نے بریفنگ دیتے ہوئے کہا کہ نیا پاکستان ہاؤسنگ اسکیم کے لئے مرکزی شاہراہ سے سوڑیزی بالا تک دس کلومیٹر دو رویہ سڑک بھی تعمیر کی جائے گی۔

سیکریٹری نے بتایا کہ اسکیم کے لیے کنسلٹنٹ کی خدمات حاصل کرنے کا عمل آخری مراحل میں ہے جبکہ پلاننگ اور ڈیزائن کا عمل اپریل تک مکمل کرلیا جائے گا۔