ملتان میں پی ایس ایل کادوسرا میچ،سیکورٹی سخت،شائقین تیار

پاکستان سپر لیگ میں آج 2 مقابلےہوں گے۔ ملتان اسٹیڈیم میں سلطانز اور کراچی کنگز دوپہر تین بجے ٹکرائیں گے۔ رات آٹھ بجے راولپنڈی میں لاہور قلندرز اور پشاور زلمی کے درمیان گھمسان کارن پڑے گا۔

ملتان میں پاکستان سپر لیگ کے دوسرے میچ کے لیے تماشائی خوب پرجوش ہیں۔ سلطانز اور کراچی کنگز دوپہر تین بجے ٹکرائیں گے۔ میچ کے لیے سيکیورٹی کےسخت انتظامات کئے گئے ہیں۔ 2800سے زائد پولیس اہلکار فرائض انجام دينے کوتيار ہیں جبکہ 270 سی سی ٹی وی کیمروں کی مدد سے ملتان اسٹیڈیم کی مکمل مانيٹرنگ کی جائے گی۔ 26 فروری سے ٹریفک کو کنٹرول کرنے کیلئے پلان بھی تیارکرلیا گيا ہے اور 1200 ٹریفک وارڈن ڈیوٹی پر موجود ہوں گے۔

ملتان سٹی سے اسٹیڈیم کے لئے آنے والے حضرات پل نہر نو بہار کے ساتھ فاطمہ جناح کالونی گیٹ نمبر 1 بہاؤ الدین زکریا سے پارکنگ ایریا میں داخل ہونگے۔ وہاڑی، خانیوال روڈ سے آنے والے حضرات  این ایل سی بائی پاس چوک سے بابرچوک، دنیا پور بائی پاس چوک سے گیٹ ملحقہ فاطمہ جناح کالونی سے پارکنگ ایریا میں داخل ہونگے۔

مظفرگڑھ ،شجاع آباد، بہاولپور اور لودھراں سے آنے والےحضرات ہیڈ ڈومری سے گیٹ ملحقہ فاطمہ جناح کالونی سے پارکنگ ایریا میں داخل ہونگے۔

سی ٹی او ملتان نے بتایا ہے کہ ٹریفک پولیس کی کوشش ہوگی کہ اسٹیڈیم آنے والے شائقین کو بھرپور سہولیات فراہم کی جائیں۔ شائقین کرکٹ کو شٹل کے ذریعےگراؤنڈ میں لایا جائے گا۔ ٹکٹ اور قومی شناختی کارڈ چيک کرنےکے بعد اسٹیڈیم میں داخلے کی اجازت ملے گی۔