کابل، آرمی پبلک اسکول حملے میں ملوث فضل اللہ کے 15دہشتگردجہنم واصل

ویب ایڈیٹر  :

کابل : افغانستان کے ضلع گومل میں امریکا کے جاسوس طیارے کی بمباری میں تحریک طالبان پاکستان گنڈا پور گروپ کے پندرہ دہشت گرد مارے گئے، یہ گروپ پشاور اسکول سانحہ کا ذمےدارہے۔

مزید پڑھیں : آرمی پبلک اسکول پشاور میں حملے کے فوری بعد کی ویڈیو سامنے آگئی،ہرانکھ اشکبار

افغانستان کے ضلع گومل میں امریکا کے فضائی حملے میں کالعدم تحریک طالبان پاکستان کے پندرہ دہشت گرد مارے گئے، یہ حملہ افغانستان میں ٹی ٹی پی کے دہشت گردوں کے خلاف حالیہ کارروائی کا حصہ تھا، دہشت گردوں کا تعلق کالعدم تحریک طالبان پاکستان کے گنڈا پورگروپ سے ہے۔

کالعدم تحریک طالبان پاکستان گنڈا پورگروپ کی قیادت کالعدم فضل اللہ کے ہاتھ میں ہے، گنڈا پور دہشت گرد گروپ نے پشاور اسکول سانحہ کی ذمےداری قبول کی تھی، ایک ہفتہ قبل پاکستان اور افغان حکومت کے درمیان دہشت گردوں کے خلاف کارروائی اورباہمی اعتماد کی بحالی کیلئے کوششوں پر اتفاق ہوا تھا۔

پاکستانی سیکیورٹی ذرائع نے حملے کی تصدیق کرتے ہوئے کہا کہ ڈرون حملہ جنوبی وزیرستان سے ملحقہ افغان سرحدی علاقے میں افغانستان کے اندر ہوا۔ واضح رہے کہ شمالی وزیرستان میں آپریشن ضرب عضب اور خیبر ایجنسی میں خیبر ٹو آپریشن کے باعث دہشت گردوں کی بڑی تعداد افغانستان فرار ہوگئی ہے۔ گزشتہ سال دو ہزار چودہ میں سولہ دسمبر کو آرمی پبلک اسکول پشاور دہشت گردوں کے سفاکانہ حملے میں بچوں اور اساتذہ سمیت 150 افراد نے جام شہادت نوش کیا۔ سماء