پاکستان چین کادشمن ایک ہے،سازشی دشمن کوپوری طاقت سےکچل دیںگے،آرمی چیف

ویب ایڈیٹر:

راول پنڈی : آرمی چیف جنرل راحیل شریف کا کہنا ہے کہ پاکستان اور چین کا دشمن مشترکہ ہے،پاک چین راہداری منصوبے کے خلاف اس سازشی دشمن کو اپنی بھرپور طاقت سے کچل ڈالیں گے۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل راحیل شریف نے چین کی فوج کی 88 ویں سالگرہ کی تقریب میں شرکت کی، اس موقع پر پاک افواج کے سربراہ جنرل راحیل کا کہنا تھا کہ چین کی پیپلزلبریشن آرمی دنیا کی بہترین فوج ہے، پاک چین مسلح افواج میں تعلقات مضبوط ہیں، ہم مل کر ان تعلقات کو غیرمستحکم کرنے والی قوتوں کو شکست دیں گے۔

آرمی چیف نے کہا کہ پاک چین دوستی شہد سے میٹھی، ہمالیہ سے اونچی اور سمندروں سے گہری ہے جب کہ دونوں ملکوں کے تعلقات نہایت مضبوط بنیادوں پر استوار ہیں اور چین کا دشمن پاکستان کا دشمن ہے۔ ان کا کہنا تھا کہ پاکستان اور چین کے باہمی تعاون سے خطے میں استحکام آئے گا اور آزمائش کی گھڑی میں دونوں ممالک کی دوستی مزید مضبوط ہوگی۔

آرمی چیف کا کہنا تھا کہ پاک فوج اور پیپلز لبریشن آرمی نے سٹرٹیجک تعلقات کی بنیاد رکھی۔ چین کی پیپلز لبریشن آرمی دنیا کی بہترین فوج ہے۔ آرمی چیف کا کہنا تھا کہ پاک چین اقتصادی راہداری منصوبے پر کام تیزی سے جاری ہے۔ راہداری منصوبے سے آنے والی نسلوں کو فائدہ ہوگا۔ منصوبے کے خلاف کسی بھی سازش کو پوری طاقت کچل دیا جائے گا۔ جنرل راحیل شریف نے پیپلزلبریشن آرمی کی 88ویں سالگرہ پر مبارکباد دی۔ سماء