بالی ووڈ اداکارہ تنوشری دتہ کے جنسی ہراسانی کے کیس کے الزام میں اداکار نانا پاٹیکر کو کلین چٹ مل گئی۔

بھارتی پولیس نے عدالت میں موقف اختیار کیا کہ نانا پاٹیکر کے خلاف جنسی ہراسانی کا کوئی ثبوت نہیں ملا، ناکافی ثبوتوں کی وجہ سے مزید تحقیقات ممکن نہیں۔

دوسری جانب تنوشری دتہ نے جنسی ہراسانی کے خلاف اپنی جدوجہد جاری رکھنے کا اعلان کیا ہے۔

ایک بیان میں تنوشری دتہ نے کہا کہ انہیں پولیس کے موقف سے کوئی حیرانی نہیں ہوئی، کرپٹ پولیس نے ایک کرپٹ شخص کو کلین چٹ دی۔

واضح رہے کہ تنوشری دتہ نے گزشتہ برس نانا پاٹیکر پر جنسی ہراسانی کا الزام لگاتے ہوئے کہا تھا کہ فلم’’ہارن اوکے پلیز‘‘کے ایک گانے کی شوٹنگ کے دوران نانا پاٹیکر نے انہیں غلط انداز میں چھونے کی کوشش کی تھی اور ان کے ساتھ برا رویہ اختیار کیاتھا۔