نورا فاتحی نے ماہرہ خان کی فلم میں آئٹم نمبر کرنے کی خبروں کی تردید کردی

مشہور مراکشی اداکارہ نورا فاتحی نے پاکستانی سپر اسٹار ماہرہ خان کی آئندہ آنے والی فلم’سُپر اسٹار ‘میں آئٹم نمبر کرنے کی تمام تر افواہوں کی تردید کر دی ہے۔

گزشتہ دنوں میڈیا میں خبریں گردش کررہی تھیں کہ ماضی کے مشہور گیت ’دلبردلبر‘ پر آئٹم نمبر کرکے شہرت حاصل کرنے والی بالی ووڈ کی آئٹم گرل نورا فاتحی کو پاکستانی اداکارہ ماہرہ خان کی آنے والی فلم ’سپر اسٹار‘ میں کاسٹ کرنے کا فیصلہ کیا گیا ہے، نورا بالی ووڈ کی طرح اس فلم میں بھی آئٹم نمبر کرتی نظر آئیں گی۔

نورا کی پاکستانی فلم میں شمولیت کی خبر نے ان کے پاکستان میں موجود چاہنے والوں کو پُرجوش کردیا تھا، تاہم نورا کی جانب سے پاکستانی فلم سائن کرنے یا نہ کرنے کے حوالے سے کوئی بیان سامنے نہیں آیا تھا لیکن اب نورا نےاس معاملے پر خاموشی توڑدی ہے۔

خاتون مداح نے ماہرہ خان کو مٹھائی بنادیا، تصاویر سوشل میڈیا پر وائرل

رپورٹ کے مطابق نورا فاتحی نے مزید کہا ہے کہ’ میں یہ نہیں جانتی کہ یہ افواہ کہاں سے پھیلی ہے، نہ ہی میں نے کوئی پاکستانی فلم سائن کی ہے اورنہ کسی فلم میں آئٹم نمبر کرنے کے لئے رضا مندی ظاہر کی ہے یہ صرف اور صرف افواہیں ہیں جن میں کوئی سچائی نہیں ہے‘، نورا نے مزید کہا اس وقت میرا دھیان مکمل طور پر اپنے کیریئر پر ہے آئٹم سونگز پر نہیں۔

ماہرہ خان اور بلال اشرف پہلی بار فلم ’سپر اسٹار‘میں ایک ساتھ

واضح رہے کہ اس خبر پرپاکستانی فلم سُپر اسٹار کی ٹیم نے اب تک کوئی بیان نہیں دیا ہے البتہ مومنہ دُرید کی پروڈکشن میں بننے والی فلم سُپر اسٹار کی شوٹنگ پاکستان کے شہر پشاور میں جاری ہے ۔

فلم سُپر اسٹارمیں ماہرہ خان کے ساتھ اداکار بلال اشرف بھی مرکزی کردار ادا کرتے نظر آئیں گے، فلم اگلے برس پاکستان بھر میں عید الفطر کے موقع پر ریلیز کی جائے گی۔