بلوچستان میں بارشوں نے تباہی مچادی، مزید 15 افراد جاں بحق، 29 زخمی

بلوچستان میں بارشوں کے سبب ٹریفک سمیت مختلف حادثات میں مزید 15 پندرہ افراد  جاں بحق 29 زخمی ہوئے ، چار روز میں مرنے والے افراد کی تعداد 27 ہو گئی ، دریائوں ندی نالوں میں طغیانی اور سیلاب سے حفاظتی بندات، کچے مکانات منہدم ہو گئے رابطہ سڑکیں پانی میں بہہ گئیں۔

ضلع مستونگ میں لک پاس کے مقام پر روڈ پر پھسلن کے باعث کراچی سے کوئٹہ آنے والی ویگن ٹرک سے ٹکرانے گئی جس کے نتیجے میں چار بچوں ، دو خواتین سمیت 11 مسافر جاں بحق 18 زخمی ہو گئے ۔

ضلع بولان ، ژوب ، بارکھان اور چاغی میں بھی دو بچوں سمیت چار افراد جاں بحق 11 زخمی ہو گئے،چار روز میں بارشوں سے مرنے والے افراد کی تعداد 27 تک پہنچ گئی 58 زخمی ہو گئے ۔

بارشوں سے گوادر،سبی، پشین، دکی، ہرنائی ، کوہلو ، قلعہ سیف اللہ ،زیارت سمیت کئی اضلاع کے دریائوں و ندی نالوں میں طغیانی و سیلاب کے سبب بیشتر دیہات زیر آب آگئے، حفاظتی بندات کھڑی فصلات،کچے مکانات، رابطہ سڑکوں اور بجلی کے کھمبوں کو نقصان پہنچا جبکہ لینڈ سلائیڈنگ سے ہرنائی کوئٹہ قومی شاہراہ بند ہو گئی شہریوں کی محفوظ مقامات کی جانب نقل مکانی جاری ہے

کوئٹہ میں بارشوں  کے سبب کئی علاقوں کی سیوریج لائنیں اور برساتی  نالے ابل پڑے، سڑکیں تالاب میں تبدیل ہو گئیں۔

محکمہ موسمیات نے صوبے میں مزید بارشوں کی پشنگوئی کی ہے ،پی ڈی ایم اے حکام کے مطابق نقصانات کی تفیصل اکھٹی کی جا رہی ہیں جبکہ بحالی کا عمل جاری ہے ، شہری غیر ضروری سفراور کچے مکانات میں رہائش سے گریز کریں