صحافی شاہ زیب جیلانی کی عبوری ضمانت میں 17 اپریل تک توسیع

کراچی کی ایک عدالت نے صحافی شاہ زیب جیلانی کی عبوری ضمانت میں 17 اپریل تک توسیع کر دی، ان کے خلاف پاکستان پینل کوڈ اور الیکٹرانک کرائمز ایکٹ کی روک تھام کے تحت مقدمہ درج کیا گیا ہے۔

ساؤتھ ڈسٹرکٹ اینڈ سیشن کورٹ کے جج امداد حسین کھوسو نے کیس کی سماعت بدھ تک ملتوی کردی۔ آئندہ سماعت میں ایف آئی اے کی جانب سے عدالت میں کیس کا چلان پیش کیے جانے کا امکان ہے۔

صحافی شاہ زیب جیلانی کے خلاف مقدمہ مولوی اقبال حیدر نامی وکیل کی مدعیت میں 6 اپریل کو ایف آئی اے نے مقدمہ درج کیا تھا۔

شکایت کنندہ نے موقف اپنایا تھا کہ مقامی ٹی وی چینل دنیا نیوز کے دو پروگرامز میں صحافی شاہ زیب جیلانی نے پاکستان کے اعلی اداروں کے خلاف توہین آمیز ریمارکس دیئے ہیں۔ ایک پروگرام 8 دسمبر 2017 ، جب کہ دوسرا پروگرام 18 مارچ 2019 کو نشر کیا گیا تھا۔

مقدمے میں سائبر دہشت گردی، الیکٹرانک جعل سازی، بدسلوکی، اکسانے اور ہتک عزت کی دفعات شامل کی گئی ہیں۔