پاکستان کے موقف کی مکمل حمایت پر ترکی کے شکر گزار ہیں،شیخ رشید

وزیر ریلوے شیخ رشید احمد نے کہا ہے کہ موجودہ ملکی صورتِ حال میں پاکستان کے موقف کی مکمل حمایت پر ترکی کے شکر گزار ہیں۔

پاکستان میں ترکی کے سفیراحسان مصطفےٰ یر داکُل نے وزیر ریلوے شیخ رشید سے ملاقات کی جس میں دونوں ملکوں کے درمیان ریل منصوبوں میں شراکت داری پر تبادلہ خیال کیا گیا۔

شیخ رشید نے پیش کش کی  کہ ترک کمپنیاں ایل ایل ٹو، تھری،کوئٹہ،تافتان اور دیگر ریل لائن منصوبوں میں شراکت داری کریں۔ وزیر ریلوے نے بتایا کہ پاکستان ریلوے کو جدید استوار پر ترقی دی جا رہی ہے۔

شیخ رشید کی چینی ریل کمپنیوں کو کوئٹہ تافتان ریل لائن اپ گریڈیشن میں شراکت داری کی دعوت

انھوں نے مزید کہا کہ ترکی،پاکستان کا انتہائی قابلِ اعتماد اور بھروسہ مند اسلامی بھائی ہے، پاکستان ترکی ہمیشہ ساتھ ساتھ ہیں، موجودہ ملکی صورتِ حال میں پاکستان کے موقف کی مکمل حمایت پر ترکی کے شکر گزار ہیں۔

گذشتہ روز، پاکستان میں چینی سفیر یاؤ جِنگ نے وزیرِ ریلوے شیخ رشید احمد سے ملاقات کی تھی جس میں پاکستان اور چین کے درمیان جاری ریل منصوبوں پر تبادلہ خیال کیا گیا۔ شیخ رشید احمد نے چینی سفیر کو بتایا کہ ایم ایل ون پاکستان ریلوے اور ملکی معیشت کے لئے انتہائی اہم ہے، چینی شراکت داری کو دیگر ریلوے منصوبوں میں بھی ترجیح دیں گے۔

وزیرریلوے نے اس خواہش کا اظہار کیا کہ عمران خان کے دورہ چین کے دوران ایم ایل ون منصوبے  پر حتمی معاہدہ طے پاجائے گا۔ شیخ رشید نے چینی ریل کمپنیوں کو کوئٹہ تافتان ریل لائن کی اپ گریڈ یشن میں شراکت داری کی دعوت بھی دی۔