کابینہ نےسابق آرمی چیف راحیل شریف کےاین اوسی کی منظوری دیدی

/

حکومت نے سابق آرمی چیف جنرل ریٹائرڈ راحیل شریف کے این او سی کی منظوری دیدی ہے۔ وفاقی کابینہ کے گزشتہ ہفتے ہونے والے اجلاس میں راحیل شریف کے این اوسی کی منظوری دی گئی۔

سابق آرمی چیف جنرل راحیل شریف کو اسلامی فوجی اتحاد کی کمانڈ کیلئے این او سی درکار تھا، جس کیلئے وفاقی کابینہ نے سپریم کورٹ کے حکم پر راحیل شریف کے لئے این او سی کی منظوری دی۔ اس سے قبل این او سی سے متعلق رپورٹ سپریم کورٹ میں جمع کرادی گئی۔

حکومت کی جانب سے سپریم کورٹ کو بتایا گیا کہ راحیل شریف کیلئے این او سی جی ایچ کیو اور وزارت دفاع نے جاری کیا تھا۔ سپریم کورٹ نے وفاقی حکومت کو ایک ماہ میں سابق آرمی چیف کی این او سی سے متعلق فیصلہ کرنے کو کہا تھا۔

این او سی کے متعلق کوئی فیصلہ کرنے کیلئے وفاقی کابینہ کو ایک ماہ کی مہلت ملی تھی۔ این او سی جاری نہ ہونے پر راحیل شریف غیر ملکی ملازمت سے سبکدوش تصور ہوں گے۔

واضح رہے کہ سابق آرمی چیف جنرل (ر) راحیل شریف پاک افواج سے ریٹائرمنٹ کے بعد 41 اسلامی ملکوں کی اتحادی فوج کے سربراہ مقرر کیے گئے تھے۔