منی بجٹ 23 جنوری کو پیش ہوگا

وزیر خزانہ اسد عمر کا کہنا ہے منی بجٹ 23 جنوری کو پیش کیا جائے گا، جس میں ٹیکس مشکلات کو دور کیا جائے گا۔ انہوں نے کہا کہ ایف بی آر کو احصل ایس آر او کے اجراء کا اختیار ختم کردیا گیا ہے۔

کراچی چیمبر آف کامرس میں منعقدہ تقریب سے خطاب میں وفاقی وزیر خزانہ اسد عمر کا کہنا تھا کہ وزیر اعظم عمران خان نے بیرون ملک جانا ہے، اس لئے اب 23 جنوری کو فنانس بل پیش کیا جائے گا، منی بجٹ میں ٹیکس اینا ملیز کو دور کیا جائے گا، کراچی پاکستان کی معیشت کا دل ہے، منی بجٹ کے حوالے سے کراچی چیمبر اگلے ہفتے اپنی ٹیم اسلام آباد بھیجے۔

انہوں نے کہا کہ نئے بجٹ میں ٹیکسوں کے حوالے سے ہر منصوبہ بندی پارلیمںٹ سے منظور ہوگی، ٹیکس پر کوئی تبدیلی چاہتے ہیں تو ایسا فوری ممکن نہیں، آنے والے دنوں میں کاروبار کرنے والے افراد کیلئے آسانی کیلئے مواقع پیدا کریں گے، نئے مالیاتی بل میں کاروباری طبقے کیلئے خوشخبریاں ہیں، منی بجٹ کے ذریعے سرمایہ کاری کیلئے سہولیات دی جائیں گی۔

وزیر خزانہ اسد عمر نے کہا کہ ہمیں علم ہے کہ ماضی میں قلم کی ایک جنبش سے ہر روز کیا کیا کام کیا گیا ہے، بغیر کسی چیک بیلنس کے کوئی اختیار ہو تو وہ اختیار نقصان دہ ہوگا، ایف بی آر کے سیچوریٹری ریگولیٹری آرڈرز (ایس آر او) کے اجراء کا اختیار ختم کردیا گیا ہے، فنانس بل میں کاروبار آسان بنانے کے اقدامات بروئے کار لائے جارہے ہیں، منی بجٹ میں کھپت کو کم اورسرمایا کاری بڑھانے کے اقدامات ہوں گے، سرمایہ کاری کے ساتھ ساتھ سیونگ کو بھی بڑھانا ہے، پاکستان میں مقامی بچت اورسرمایہ کاری کم ترین سطح تک آگئی ہے، سرمایہ کاری ہوگی تو معیشت آگے بڑھے گی اورروزگار پیدا ہوگا، جب کہ تحریک انصاف کے منشور میں شامل ہے کہ کاروبار میں سہولتیں فراہم کی جائیں گی۔

وفاقی وزیر نے کہا کہ جنوبی ایشیاء میں علاقائی تجارت نہ ہونے کے برابر ہے، خطے میں پاکستان کی تجارت کو بڑھایا جائے گا، درآمدات کی بنیاد پر کھپت پر قابو پایا جائے گا، کھپت کی بنیاد پر معیشت چلانے سے تجارتی خسارہ خطرناک حد تک بڑھ گیا ہے جب کہ کاروبار میں آسانی پیدا کرنے کے لیے ہرماہ وزیراعظم کی صدارت میں اجلاس منعقد کیا جاتا ہے، وزیراعظم نے بھارت سے مسائل پر بات چیت کیلیے ہاتھ بڑھایا لیکن افسوس کی بات ہے کہ بھارت نے پاکستان کے پیغام کا مثبت جواب نہیں دیا جب کہ ترکی میں عوامی سطح پر پاکستان کیلئے خیرسگالی کا جذبہ ہے لیکن دونوں ملکوں میں تجارت اتنی نہیں، البتہ ترکی سے تجارتی وفود کے تبادلے پر بات چیت ہوئی ہے۔

قبل ازیں کامرس چیمبر آمد پر وفاقی وزیر خزانہ اسد عمر نے کراچی چیمبر کے ممبران اور بزنس مین گروپ چئیرمین سراج قاسم تیلی سے ملاقات کی۔ ملاقات میں سراج قاسم تیلی کا کہنا تھا کہ وفاقی حکومت آئین کے آرٹیکل 158 پر عمل درآمد کو یقینی بنائے اور سندھ سے نکلنے والی گیس سے پہلے سندھ کی ضروریات کو پورا کیا جائے۔