دیر: نوسربازوں نے بینک منیجر بن کر لیویز اہلکار سے 6 لاکھ لوٹ لیے

خیبر پختونخوا کے علاقہ دیر بالا میں نوسربازوں نے فراڈ کے ذریعے لیویز اہلکار کے اکاؤنٹ سے 5 لاکھ 94 ہزار روپے لوٹ لیے ہیں۔

متاثرہ اہلکار نیاز محمد نے سماء کے نمائندہ زاہد جان کو بتایا کہ مجھے بنک منیجر کے نام سے موبائیل پر کال آئی اور تفصیلات بتانے کیلئے کہا گیا۔

نیاز محمد نے فراڈیوں کو واقعی بینک منیجر سمجھ کر اپنے کاؤنٹ سے متعلق تمام حساس معلومات فون پر بتا دیں اور فراڈیوں نے اسی رات نیاز محمد کے بینک اکاونٹ میں موجود 5 لاکھ 94 ہزار روپے ہتھیا لیے۔ رقم دوست نے اس کے پاس امانت رکھوائی تھی۔

متاثرہ لیویز اہلکار نے کہا کہ بینک انتظامیہ کو فراڈ سے آگاہ کیا تاہم وہ کسی قسم کی ذمہ داری لینے سے انکار کر رہے ہیں۔ قانونی کارروائی کے لیے ڈپٹی کمشنر کو درخواست دی ہے۔